Վերջին շրջանում Հայաստանում գործող տուրիստական գործակալությունները սկսել են սակավ զանգեր ստանալ քաղաքացիներից, ովքեր հետաքրքրված են Հունաստանում կազմակերպվող հանգստով: «Զանգերը քչացել են: Մարդիկ այլևս քիչ են հետաքրքրված Հունաստանով»,- «Առաջին լրատվական»-ի հետ զրույցում ասաց «Գոլդ Թրևլ» ընկերության աշխատակցուհին:
Նշենք, որ Հունաստանում ստեղծված տնտեսական ճգնաժամի պատճառով կաթվածահար է եղել բանկային համակարգը, բանկերից շատերը մինչ օրս չեն գործում, երկիրը չի կարողանում կատարել իր ստանձնած վարկային պարտավորությունները: Երկրում քննարկվում է անգամ Եվրամիությունից և եվրոյի գոտուց դուրս գալու հարցը, ինչը նոր ճգնաժամի առաջ կկանգնեցնի երկիրը:
Ստեղծված վիճակը բավական անհարմար վիճակում է դրել Հունաստանում հանգստանալ ցանկացող զբոսաշրջիկներին, ովքեր այս օրերին չեն կարողանում բանկոմատներից գումար կանխիկացնել, իսկ լավագույն դեպքում կարողանում են կանխիկացնել 60 եվրոյի չափով գումար:
Հայաստանյան տուրիստական կազմակերպություններից մեզ հետ զրույցում ասացին, որ ճիշտ է՝ մարդկանց հոսքը նվազել է, բայց արժույթի հետ կապված խնդիրներ դեռևս չեն առաջանում: «Մենք հատուկ խորհուրդներ չենք տալիս, բայց հասկանալի է, որ եվրո են վերցնում իրենց հետ, և այնտեղ էլ առևտուրը իրականացվում է եվրոյով»,- ասաց մեզ հետ զրուցած աշխատակցուհին:
Ինչ վերաբերում է գնային քաղաքականությանը, ապա տուրիստական գործակալության աշխատակցուհին ասաց, որ դեպի Հունաստան փաթեթների գները փոփոխության չեն ենթարկվել: «Նույն գներն են, ինչ մինչ ճգնաժամը»:
Մինչդեռ «Գո թրևլ» տուրիստական գործակալությունից մեզ հետ զրույցում ասացին, որ ոչ մի փոփոխություն չի եղել: Մարդիկ իրենց ընկերությունից առաջվա պես հետաքրքրվում են Հունաստանում կազմակերպվող հանգստով՝ ընդգծելով, որ Հունաստանն այս տարի առաջատար երկրների շարքում է, որտեղ հայերը նախընտրում են անցկացնել իրենց ամառային հանգիստը:
«Գո թրևլ» ընկերության աշխատակցուհին ասաց, որ իրենք իրենց հաճախորդներին խորհուրդ են տալիս իրենց հետ կանխիկ եվրո վերցնել, որպեսզի Հունաստանում գումար կանխիկացնելու կամ արժույթի փոփոխության անհրաժեշտություն չառաջանա: «Դեռևս պաշտոնապես ոչինչ չկա, որպեսզի մենք մեր հաճախորդներին հորդորենք այլ արժույթ վերցնել իրենց հետ կամ այլ քայլերի դիմել: Առայժմ մենք խորհուրդ ենք տալիս իրենց հետ կանխիկ եվրո վերցնել, որպեսզի խնդիրներ չառաջանան: Ու մինչ այսօր դեռ որևէ հաճախորդ չենք ունեցել, որ խնդիրների հանդիպած լինի»,- ասաց մեր զրուցակիցը:
Մի քանի այլ տուրիստական ընկերությունների մոտ հաճախորդների հոսքի նվազում էր նկատվել, սակայն նրանց խոսքով՝ «խուճապային տրամադրություններ չկան»:
Նշենք, որ Հունաստանը պարտավորվել էր մինչև հուլիսի 9-ը եվրոգոտու և Եվրամիության անդամ մյուս պետություններին ներկայացնել պարտքերի մարման և երկրում տնտեսական իրավիճակի բարելավման ծրագիր: Հունաստանի վարչապետը խոստացել է, որ շատ արագ իրենք քայլեր կձեռնարկեն երկրում բանկային համակարգի բնականոն աշխատանքը վերականգնելու համար:
