Պակիստանի իշխանությունները պատրաստ են միջուկային զենք կիրառել իր անվտանգությանը լուրջ սպառնալիքի դեպքում: Հնդկական The Times of India թերթի հաղորդմամբ՝ այս մասին հայտարարել է այդ երկրի պաշտպանության նախարար Խավաջա Ասիֆը:
«Մենք պետք է աղոթենք, որ դա մեզ երբեք պետք չգա, սակայն մեզ անհրաժեշտ է այն (միջուկային զենքը) կիրառել, եթե մեր գոյությունը հայտնվի սպառնալիքի տակ. այդ դեպքում մենք դա կանենք»,- ասել է Ասիֆը: Նա միաժամանակ նշել է, որ Պակիստանը վստահ է իր պաշտպանական ներուժի մեջ:
Ամերիկյան Bulletin of Atomic Scientists ամսագրի տեղեկացմամբ՝ ներկայումս Պակիստանի զինված ուժերի տրամադրության տակ կա առնվազն 120 մարտական միջուկային սարք: Երկրի իշխանությունները բազմիցս հայտարարել են, որ մտադիր չեն միանալ Միջուկային զնեքի չտարածման մասին պայմանագրին՝ այդ փաստաթղթի «խտրական բնույթի» պատճառով:
Պակիստանի ԱԳՆ ղեկավարի տեղակալ Ազիզ Ահմադ Չոուդրիի խոսքով՝ Իսլամաբադը մտադիր չէ «միջուկային մրցավազքի» մեջ մտնել հարևան Հնդկաստանի հետ, սակայն կշարունակի աջակցել միջուկային հավասարությանը Հարավասիական տարածաշրջանում: Հնդկաստանը, ամերիկյան պարբերականի տեղեկությամբ, մոտ 110 միջուկային սարք ունի:
