Կառավարության կողմից սուբսիդավորվող գյուղատնտեսական վարկերի վարկային մեկ պորտֆելի առավելագույն չափը 3 մլն դրամ է, իսկ վարկը տրվում է մինչև երկու տարի ժամկետով: Այս մասին առաջին լրատվականի հետ զրույցում նշեց ՀՀ գյուղատնտեսության նախարարության գյուղատնտեսության և գյուղի սոցիալական զարգացման ծրագրավորման վարչության պետ Հրաչիկ Ծպնեցյանը:
Հիշեցնենք, որ այս տարի կառավարությունը բոլոր գյուղերում սուբսիդավորելու է գյուղատնտեսական վարկերը` հիմնականում 4 տոկոսային կետով (որի արդյունքում վարկի տոկոսադրույքը գյուղացիների համար կկազմի 10%), իսկ առավել աղքատ 225 համայնքներում` 6 տոկոսային կետով (գյուղացիների համար վարկի տոկոսադրույքը կկազմի 8%):
Վարկերի տրամադրման մյուս պայմանները որոշում են բանկերը: Ծրագիրն իրականացվում է «Ակբա կրեդիտ ագրիկոլ», «Արդշինինվեստ» և «Կոնվերս» բանկերի միջոցով: Նշենք, որ մեր տեղեկություններով որպես գրավ այս բանկերը հիմնականում ընդունում են միայն բնակարանները, չեն ընդունում ոչ անասուններ, ոչ էլ հողեր: Սա վերաբերում է նախ և առաջ առավել աղքատ 225 համայնքներին:
Նշենք նաև, որ մեր տեղեկություններով վարկեր ստանալու համար այդ բանկերում գրանցվածների թիվը բավականին մեծ է:
