Հոլանդացի ուսանողները ստեղծել են առաջին ընտանեկան ունիվերսալ ավտոմեքենան՝ արևային մարտկոցներով: Կոնցեպտի շնորհանդեսը շատ հիացական արձագանքներ է ստացել: Այդ ավտոմեքենան առաջինն է, որը ավելի քիչ էներգիա է ծախսում, քան մշակում են դրա արևային մարտկոցները՝ հայտնում է novate.ru-ն:
Էյնդհովենի Տեխնիկական համալսարանից ուսանողների խումբը ստեղծել է աշխարհում առաջին կոնցեպտուալ ավտոմեքենան: Մեքենան ցուցադրվել է Ավստրալիայում՝ World Solar Challenge մրցույթում: Նախագծի շրջանակներում 21 ուսանողներն իրենց անվանել են Solar Team Eindhoven:
Ինովացիոն ավտոմեքենան ստացել է Stella Lux անվանումը: Դրա ստեղծման ժամանակ ակտիվորեն օգտագործվել է ածխածնի մանրաթել: Դա հնարավորություն է տվել առավելագույնս կրճատել ավտոմեքենայի քաշը: Stella Lux-ը կշռում է 375 կգ: Մեքենան աշխատում է էլեկտրական շարժիչով, որը սնվում է ավտոմեքենայի տանիքին տեղադրված արևային մարտկոցներով, նաև 15 կՎտ/ժ լրացուցիչ մարտկոցով: Մեքենայի ամբողջական լիցքավորմամբ հնարավոր է անցնել 1000 կմ՝ արևի ուղիղ ճառագայթների պարբերաբար հայտնվելու պայմանով: Stella Lux-ի առավելագույն արագությունը 125 կմ/ժ է:
