Եմենի ընդդիմությունը կիրակի օրը համաձայնել է թույլ տալ երկրի նախագահ Ալի Աբդալլահ Սալեհին հեռանալ երկրից, եթե վերջինս կամովին հրաժարական տա, այլ ոչ թե պաշտոնը փոխանցի իր տեղակալին: Այս մասին Էր-Ռիյադում տեղի ունեցած բանակցությունների ժամանակ հայտարարել է Սուլթան Ալ-Աթվանին,- հաղորդում է Associated Press գործակալությունը:
Տեղեկացնենք, որ նախօրեին Սաուդյան Արաբիայի մայրաքաղաք Էր-Ռիյադում տեղի է ունեցել Պարսից ծոցի արաբական պետությունների համագործակցության խորհրդի արտաքին գործերի նախարարների խորհրդի նիստը, որին մասնակցել են նաև Եմենի ընդդիմության ներկայացուցիչները` նախկին արտգործնախարար Մուհամադ Բասինդվայի գլխավորությամբ: «Մենք ցանկանում ենք, որ նա հրաժարական տա, այլ ոչ թե իշխանությունը փոխանցի փոխնախագահին, իսկ դրանից հետո ինչ ուզում է՝ թող անի: Եթե նա կցանկանա լքել Եմենն ու ապրել ուրիշ երկրում՝ դա իր գործն է»,- ասել է Ալ-Աթվանին հանդիպման վերջում:
Ապրիլի 17-ին Եմենում շարունակվել են բախումները հակակառավարական ցույցերի մասնակիցների և իրավապահների միջև: Մայրաքաղաք Սանա’այում, որտեղ բողոքի հանրահավաքին մասնակցում էր մի քանի հարյուր հազար մարդ, ոստիկանները կրակ են բացել ցուցարարների վրա: Նախնական տվյալներով` վիրավորվել է 10 մարդ: Բողոքի ցույցեր են եղել նաև Թայիզ, Իբ, Ալ-Հուդայդե քաղաքներում: