eLife պարբերականի փոխանցմամբ՝ գիտնականները պարզել են, որ առնետներն ունակ են քնի մեջ տեսնել այն տեղը, ուր նրանք կցանկանային հայտնվել, ինչպես որ մարդն է քնի մեջ շրջում այն քաղաքների փողոցներով, ուր նա երազում է այցելել:
Լոնդոնի համալսարանական քոլեջի ներկայացուցիչ Հյուգո Սփիրսը հայտարարել է, որ եթե առնետին ցույց տաս թունելի վերջում գտնվող սնունդը, ուր նա չի կարող հասնել, իսկ հետո նրան թույլ տաս քնել, ապա նրա ուղեղում «բռնկվում» են նեյրոնները՝ ցույց տալով դեպի սնունդ տանող ճանապարհը:
Արթնանալուց հետո առնետներին վերադարձրել են լաբիրինթոս, սակայն արդեն առանց վանդակի, և նրանք վազել են հենց այն ուղիով, որը տեսել են քնած ժամանակ: Այդ փորձը ցույց է տալիս նաև, թե ինչպես է քունը հստակեցնում սուբյեկտի նպատակներն ու երազանքները:
