Այսօր հայտնի է դարձել, որ Ռուսաստանի Դաշնության խորհրդարանի Վերին պալատի ղեկավար Սերգեյ Միրոնովը հրաժարվել է «Արդար Ռուսաստան» կուսակցության ղեկավարի պաշտոնից: Այս մասին նա ասել է Interfax գործակալությանը` կուսակցության համագումարից առաջ, որը սկսվել է այսօր առավոտյան:
Միրոնովն իր այս քայլը բացատրել է նրանով, որ ինքը շատ զբաղված է Վերին պալատում և այսուհետ կուսակցության նախագահի պաշտոնը կզբաղեցնի Նիկոլայ Լևիչևը: Միրոնովը միաժամանակ ավելացրել է, որ ինքը շարունակում է մնալ կուսակցության առաջնորդ և առաջիկա խորհրդարանական ընտրությունների ժամանակ կգլխավորի կուսակցության ցուցակը:
Ինչ վերաբերում է համագումարին նրա ելույթին, ապա հատկանշական է, որ Միրոնովը խոսել է ընտրությունների ժամանակ բազմաթիվ խախտումների մասին: «Խոսակցություններն արդար ընտրությունների վերաբերյալ ոչ այլ ինչ են, քան միայն խոսքեր», ասել է նա:
Վերլուծաբանները նշում են, որ Միրոնովի այսօրվա հայտարարություններն իրավիճակ են փոխում Ռուսաստանի քաղաքական դաշտում: Նախ` Միրոնովն այսօր հայտարարել է, որ իր կուսակցությունը չի պատրաստվում պաշտպանել իշխող «Եդինայա Ռոսիա» կուսակցության առաջադրած թեկանծուին: Իսկ եթե հաշվի առնենք, որ նախօրեին «Եդինայա Ռոսիա»-ն հայտարարել էր, որ իրենց թեկնածուն կուսակցության առաջնորդ Վլադիմիր Պուտինն է, ապա Միրոնովի հայտարարությունները կարող են դիտվել ոչ այլ ինչ, քան բացահայտ առճակատում:
Բացի այդ, կարծիքներ են հնչում, որ Միրոնովն ընտրություններից առաջ այս քայլին գնում է մեկ նպատակով` ճանապարհ բացել մեկ այլ խոշոր գործչի համար: Վերլուծաբանները նշում են, որ այդ մարդը շատ հնարավոր է` գործող նախագահ Դմիտրի Մեդվեդևն է, որին կուսակցությունը պատրաստվում է առաջադրել որպես նախագահի թեկնածու: Պատահական չէ, որ Միրոնովն Interfax-ին տված հարցազրույցում ասել է, որ իր կուսակցությունը հանդես է գալու սեփական թեկնածուով: