Թուրքական Taraf թերթի փոխանցմամբ՝ Ստամբուլի հանրապետական դատախազությունը պահանջել է մինչև 4 տարի և 8 ամիս ժամկետով ազատազրկել քանդակագործ, Կարսում հայ-թուրքական բարեկամությունը խորհրդանշած հուշարձանի հեղինակ Մեհմեթ Աքսոյին:
Երբ Թուրքիայի ներկայիս նախագահ Ռեջեփ Էրդողանը 2011 թվականի հունվարին, երբ դեռ վարչապետ էր, այցելեց Կարս և «այլանդակ» որակեց ու կարգադրեց ապամոնտաժել Աքսոյի հեղինակած հուշարձանը, վերջինս դատի տվեց Էրդողանին՝ արվեստի գործը վիրավորելու համար:
Աքսոյը շահել էր դատը, դատարանն Էրդողանին պարտավորեցրել էր վճարել 10.000 լիրա փոխհատուցում: Ավելի ուշ լրագրողներից մեկն Աքսոյին հարցրել է, թե ինչպես է վարվելու այդ գումարի հետ, և արդյոք նա չի՞ պատրաստվում նոր քանդակներ ստեղծել դրանով: Ի պատասխան՝ Աքսոյը հայտարարել է, որ ինքը «հարամ փողով քանդակներ չի պատրաստում»:
Էրդողանն Աքսոյի այդ խոսքերը վիրավորական է համարել և դատի է տվել նրան: Այժմ Աքսոյին սպառնում է 1 տարի և 2 ամսից մինչև 4 տարի և 8 ամսվա ազատազրկում:
Հիշեցնենք, որ Կարսում հայ-թուրքական բարեկամությունը խորհրդանշած հուշարձանի ապամոնտաժման աշխատանքները մեկնարկել են 2011 թվականի ապրիլի 24-ին՝ Հայոց ցեղասպանության 96-րդ տարելիցին: Էրդողանը դրանով ձգտում էր ստանալ ազգայնական ընտրազանգվածի աջակցությունը՝ նույն թվականի ամռանը երկրում կայանալիք խորհրդարանական ընտրությունների ժամանակ:
