Եգիպտոսի նախկին նախագահ Հոսնի Մուբարաքը, որն այս պահին գտնվում է հիվանդանոցում` կալանքի տակ, կարող է դատապարտվել մահապատժի:
Այս մասին եգիպտական Al-Ahram թերթին ասել է Եգիպտոսի վճռաբեկ դատարանի նախագահ Զաքարիա Շալաշը:
«Մուբարաքին կարող է սպառնալ մահապատիժ, եթե դատարանն ապացուցի դիտավորյալ սպանությանն առնչվող այն մեղադրանքները, որոնք առաջադրվել են երկրի նախկին ղեկավարին»,- ասել է Շալաշը:
Նա նաև հավելել է, որ եթե նախկին նախագահի համար «ամեն ինչ լավ ընթանա», և ապացուցվեն միայն ֆինանսական խարդախությունների մեղադրանքները, ապա Մուբարաքը կդատապարտվի նվազագույնը 3 տարվա ազատազրկման:
Նա նաև կարծիք է հայտնել, որ Հոսնի Մուբարաքին առաջադրված մեղադրանքներով դեռ երկար քննություն է ընթանալու` ավելացնելով, որ անթույլատրելի կլինեն ճնշումները քննության վրա` ինչպես դատական համակարգի, այնպես էլ ժամանակավոր զինվորական իշխանությունների կողմից:
Շալաշը եզրակացրել է, որ միայն հիմնավոր և անկախ դատական որոշումը կարող է երկիր վերադարձնել այն ֆինանսական միջոցները, որոնք, ըստ քննության, երկրից դուրս են բերվել Մուբարաքի իշխանության տարիներին:
