Արկտիկան հայտնի զբոսաշրջային ուղղություններից է։ Ճանապարհորդներին այստեղ է գրավում, չնայած ցրտին, բացառիկ կենդանական աշխարհը։ Ձյունե թագավորությամբ կարելի է հիանալ Noorderlicht նավից, որով ամռանը զբոսանքներ են կազմակերպվում, իսկ ձմռանը այն դառնում է «սառցե» հյուրանոց՝ գրում է Kulturologia.ru-ն:
Նավը կառուցվել է 1910-ին՝ Գերմանիայի Ֆլենսբուրգ քաղաքում: Հետագայում 3 անգամ փոխվել է նրա անվանումը։ Երկրորդ համաշխարհային պատերազմի տարիներին այն ներառվել է գերմանական նավատորմիղի կազմում։ Նավը շահագործումից դուրս է եկել 1963-ին: Միայն 1991-ից հետո Noorderlicht-ը սկսել են որպես զբոսանավ գործածել:
Տաք ամիսներին նավը շրջում է Շպիցբերգեն կղզեխմբի մերձակայքում գտնվող գեղատեսիլ վայրերում: Այն ունի 10 նավախուց, կարող է տեղավորել առավելագույնը 20 ուղևորների: Նավում կա նաև երկու փչովի նավակ:
Ձմռան գալուն պես՝ նավը հայտնվում է իր տեղակայման մշտական վայրում. սկսում է գործել որպես հյուրանոց:
