Մոսկվաբնակ անկախ իրավապաշտպան Արբակ Խաչատրյանը ապրիլի 23-ին բաց նամակով դիմել էր Ռուսաստանի նախագահ Վլադիմիր Պուտինին: Նամակում, ի թիվս այլ հարցերի, Արբակ Խաչատրյանն անդրադարձել էր ուկրաինական ճգնաժամին, Հայաստանում տիրող իրավիճակին և, որ ամենակարևորն է, մեր երկրին սպառնացող արտաքին մարտահրավերներին:
Բաց նամակը լույս էր տեսել Ռուսաստանի հեղինակավոր «Արգումենտի նեդելյա» առցանց պարբերականում, որն ունեցել է բազմաթիվ դիտումներ և արձագանքներ:
«Առաջին լրատվական»-ի հետ զրույցում Արբակ Խաչատրյանն ասաց, որ նամակում տեղ գտած բազմաթիվ մտքեր շարունակում են մնալ արդիական՝ որոշ կանխատեսումներ արդեն իրականացել են, որոշներն էլ իրականանալու վտանգի տակ են: Մեր զրուցակցի կարծիքով՝ կա իրական վտանգ, որ Բաքվում անցկացվող Եվրոպական խաղերի ավարտից հետո Ադրբեջանը կարող է դիմել ռազմական գործողությունների:
«Մարդիկ, որոնք այսօր թալանի միջոցով պաշտոններ են զբաղեցնում, չեն կարող որևէ հարց լուծել: Հայաստանում նմանատիպ մարդկանց մաքրում չի լինում, այդ մարդիկ երբեք իրենց ունեցվածքներից չեն հրաժարվի ու հանուն հայրենիքի ինչ-որ քայլերի չեն դիմի: Ադրբեջանի այս սադրանքներն անընդհատ կլինեն, և ընդհանրապես՝ իրավիճակն այնքան ժամանակ է լարվածության մեջ լինելու՝ մինչև որ Հայաստանի և Ադրբեջանի հարաբերությունները չբարելավվեն, իսկ այսօր երկու կողմից էլ քաղաքական կամք չկա»,- ընդգծեց Խաչատրյանը:
Մեր զրուցակիցը հավելեց, որ Հայաստանը պետք է պատրաստ լինի նոր սպառնալիքների. «Ես կասկածում եմ, որ լինի լայնամասշտաբ պատերազմ, դա Ադրբեջանի տնտեսությանը մեծ հարված կհասցնի, բայց այն, որ հարված կլինի՝ դա միանշանակ է»:
Արբակ Խաչատրյանը հավելում է, որ դեռևս տասը տարի առաջ Վլադիմիր Պուտինին ուղղված նամակում զգուշացրել էր՝ չսերտացնել Ադրբեջանի հետ հարաբերություններն ի վնաս Հայաստանի, իսկ այսօր եթե այդ հարաբերություններն էլ ավելի սերտանան՝ Ռուսաստանը կկորցնի Հարավային Կովկասում իր ամենահավատարիմ դաշնակցին՝ Հայաստանին:
«Այսօր Հայաստանը գտնվում է մի կառույցում՝ Եվրասիական տնտեսական միության մեջ, որտեղ երկրների 90 տոկոսից ավելին Ադրբեջանի բարեկամներն են, այս իրավիճակում ո՞րն է նրա ակնկալիքը՝ Ղարաբաղի հարց լուծե՞լը: Ոչ՝ իհարկե, նման բան չի լինի, ղեկավարությունները դա անելու կամք չունեն»,- եզրափակեց նա: