Այսօր՝ ժամը 00.07-ին տեղեկություն է ստացվել, որ Շիրակի մարզի Գյումրի քաղաքի Գ. Նժդեհի փողոցի թիվ 7 հասցեում գտնվող թիվ 2 արդեն հանրահայտ հանրակացարանում տեղի է ունեցել հերթական փլուզումը: Փլուզվել է շենքի տանիքը (մոտ 60 քմ) և կողային պատը (մոտ 100 քմ): Բարեբախտաբար, տուժածներ չկան:
Հիշեցնենք, որ հիշյալ շենքն ունի 4-րդ կարգի վթարայնության աստիճան, սակայն չնայած դրան, շենքում ապրում էին մոտ 10 մարդիկ, որոնք հրշեջ-փրկարարների օգնությամբ տարհանվել են:
Դեռևս մի քանի օր առաջ տեղի ունեցած հերթական փլուզման ժամանակ «Առաջին լրատվական»-ը փորձեց Շիրակի մարզային ու Գյումրու քաղաքային իշխանություններից հետաքրքրվել ինչպես շենքի, այնպես էլ այնտեղ ծվարած 10 բնակիչների հետագա ճակատագրով:
Խնդրո առարկա շենքի հետ կապված «Առաջին լրատվական»-ի հետ զրույցում լրատվության գծով Շիրակի մարզպետի օգնական Արաքսյա Կիրակոսյանը նշեց, որ շենքը մասնավոր սեփականություն է, պետական կարգավիճակ չունի:
Մեր հարցմանն ի պատասխան Գյումրու քաղաքապետարանից տեղեկացրին, որ տվյալ հարցում քաղաքապետարանի դերը շատ փոքր է, քանի որ անօթևանության հարցը միայն տեղական մակարդակի հարց չէ, այլ համապետական: Անշուշտ, քաղաքային իշխանությունները մտահոգ են ինչպես շենքի, այնպես էլ այնտեղ ապաստանած ընտանիքների ճակատագրով, սակայն ի վիճակի չեն միայնակ այս խնդրին լուծում տալ և առհասարակ այս հարցը պետք է ավելի գլոբալ լուծում ստանա:
«Առաջին լրատվական»-ի հետ զրույցում Գյումրու քաղաքապետի մամլո խոսնակ Լիլիթ Մակարյանը մանրամասնեց, որ քաղաքապետը բազմիցս է դիմել կառավարություն վթարայինների հարցով, որին ի պատասխան տեղեկացրել են, որ միջոցներ լինելու դեպքում կանդրադառնան այդ հարցին: Ինչ վերաբերում է արդեն հիշյալ հանրակացարանին՝ տիկին Մակարյանը նշեց, որ շենքը սեփականաշնորհված է, ունի սեփականատեր և քաղաքային բալանսի մեջ չէ:
Ի դեպ, Գյումրիում կա 88 վթարային շենք, որից 10-ը՝ 4-րդ աստիճանի: Վերջերս Գյումրի կատարած իր աշխատանքային այցի շրջանակներում ՀՀ քաղաքաշինության նախարար Նարեկ Սարգսյանը անդրադառնալով վթարայինների խնդրին՝ նշեց, որ մշակվում են այլընտրանքային ու ոչ տրադիցիոն մեթոդներ խնդրին լուծում տալու համար: Թերևս պարոն նախարարի այլընտրանքային ու ոչ տրադիցիոն մեթոդները ավելի արագ սկսեն մշակել ու առաջինը կիրառեն Գյումրիում ծածկից զրկված տաս բնակիչների մասով:
Հ. Գ. «Առաջին լրատվական»-ը շարունակելու է հետամուտ լինել ինչպես այս, այնպես էլ մյուս վթարայինների ու վերջիններում բնակվող ընտանիքների ճակատագրով:
