Թուրքական Dünya Bülteni լրատվական կենտրոնի փոխանցմամբ՝ համաշխարհային մամուլում մեծ արձագանք են գտել հունիսի 7-ին Թուրքիայում անցկացված խորհրդարանական ընտրությունների արդյունքները:
Բրիտանական The Guaridan թերթը գրել է, որ Թուրքիայի նախագահ Ռեջեփ Էրդողանի «Արդարություն և զարգացում» կուսակցությունը այս անգամ ստացել է քվեների 42 տոկոսը, մինչդեռ նախորդ ընտրություններում՝ 49 տոկոսը: Թերթն ուշադրություն է հրավիրում այն հանգամանքի վրա, որ երկար տարիներ անց իշխող կուսակցությունը զրկվել է կառավարություն ձևավորելու համար մեծամասնությունից:
BBC-ն նույնպես ուշադրություն է հրավիրել Էրդողանի կուսակցության կողմից խորհրդարանում մեծամասնությունը կորցնելու վրա՝ նշելով, որ 13-ամյա միակուսակցական կառավարման ավարտը ամբողջովին խառնում է նախագահ Էրդողանի լիազորությունների մեծացման ծրագրերը:
Բացի այդ, այն ընդգծել է քրդամետ «Ժողովրդադեմոկրատական» կուսակցության (ԺԴԿ) կողմից առաջին իսկ փորձից 10 տոկոսանոց ընտրաշեմը հաղթահարելն ու խորհրդարան անցնելը:
Գերմանական ZDF հեռուստաալիքը հայտնել է, որ ԱԶԿ-ն այժմ հայտնվել է ընդդիմադիր կուսակցությունների հետ կոալիցիա կազմելու խնդրի առջև, և որ բարդացել է Էրդողանի համար կառավարման նախագահական համակարգին անցում կատարելը:
Ամերիկյան Associated Press լրատվական գործակալությունն ուշադրություն է հրավիրում այն հանգամանքի վրա, որ ԱԶԿ-ը 2002 թվականից սկսած՝ առաջին անգամ կորցրել է իր ուժը: Գործակալությունը հաղորդում է, որ քրդամետ ԺԴԿ-ի հաջողության հասնելն ԱԶԿ-ի համար նշանակում է կորուստներ կրել:
Դրա պատճառն այն է, որ եթե Թուրքիայի հարավարևելյան քրդաբնակ նահանգների բնակչությունն իր քվեն հիմնականում տալիս էր ԱԶԿ-ին, ապա այս անգամ նա տվել է ԺԴԿ-ին:
Բրիտանական Reuters ու ֆրանսիական France Presse լրատվական գործակալությունները նույնպես ուշադրություն են հատկացրել ԱԶԿ-ի համար իշխող ուժի կարգավիճակը կորցնելու և քրդամետ կուսակցության հաջողության վրա:
Երեկվա խորհրդարանական ընտրությունների արդյունքներով՝ «Արդարություն և զարգացում» կուսակցությունը (ԱԶԿ) հավաքել է քվեների 40.86 տոկոսը (18.849.470 քվե), ընդդիմադիր Ժողովրդահանրապետական կուսակցությունը՝ 24.96 տոկոսը (11.512.438 քվե), «Ազգայնական շարժում» կուսակցությունը (ԱՇԿ)՝ 16.29 տոկոսը (7.515.904 քվե), քրդամետ «Ժողովրդադեմոկրատական» կուսակցությունը (ԺԴԿ)՝ 13.12 տոկոսը (6.050.844 քվե), մնացյալ կուսակցությունները՝ 4.77 տոկոսը (2.203.312 քվե):
ԱԶԿ-ը 550 հոգանոց խորհրդարանում ստանում է 254 պատգամավորական մանդատ (կեսից պակաս), ԺՀԿ-ը՝ 132, ԱՇԿ-ը՝ 82, ԺԴԿ-ը՝ 82: Թուրքիայում պատգամավորներն ընտրվում են 4 տարով:
