«Առաջին լրատվական»-ը երեկ հաղորդել էր, որ Պրահայի գերագույն դատարանը շաբաթասկզբին տեղական դատարան լրացուցիչ քննության է ուղարկել Հայաստանի քաղաքացի «օրենքով գող», քրեական աշխարհում «Զապ» մականունով հայտնի Անդրանիկ Սողոյանի գործը։ Չեխիայի դատախազությունը Սողոսյանին մեղավոր է համարում 2007 թվականի նոյեմբերին Վացլավի հրապարակում կատարված երկու անձանց սպանության պատվիրատուն լինելու մեջ։
Այս գործով Սողոյանն անցյալ տարվա հոկտեմբերին ազատ է արձակվել դատարանի դահլիճից և վերադարձել է Գյումրի։ Չեխիայի դատախազությունը, ըստ այդ երկրի լրատվամիջոցների հաղորդման, չեն կարծում, որ Անդրանիկ Սողոյանը կամովին կվերադառնա` կանգնելու չեխական արդարադատության առաջ, ուստի անհրաժեշտության դեպքում կարող է Հայաստանի իշխանություններին պաշտոնապես ներկայացնել Չեխիայի հանրապետություն` ամբաստանյալի վերադարձը ապահովելու միջնորդություն:
Հայաստանի Ոստիկանության մեր աղբյուրները, այսօր առավոտյան մեզ հայտնեցին, որ եթե Չեխիայի հանրապետության իրավապահները պաշտոնապես միջնորդեն, Հայաստանը կապահովի «օրենքով գող» Անդրանիկ Սողոյանի վերադարձը Չեխիա։