Այսօր Սիրահարների այգում Բնապահպանության օրվան նվիրված միջոցառման ժամանակ «Առաջին լրատվական»-ը Միջազգային տնտեսական ինտեգրման և բարեփոխումների նախարար, փոխվարչապետ Վաչե Գաբրիելյանից հետաքրքրվեց, թե ինչու ԵՏՄ-ին անդամագրվելուց հետո մաքսատուրքերի էական աճ այդպես էլ չգրանցվեց՝ հակառակ բոլոր կանխատեսումների: «Մեր սպասելիքներն արդարացել են: Մենք ավելի շատ եկամուտներ ենք ստացել Մաքսային միության մաքսակետերից, քան հավաքագրվել է Հայաստանի Հանրապետությունում»,- ասաց Գաբրիելյանը:
Ինչ վերաբերում է Ռուսաստանի հետ առևտրաշրջանառության ծավալների կրճատմանը, նախարարն ասաց, որ դա չպետք է կապել Մաքսային միության հետ: «Դա կախված է տնտեսական իրավիճակից, որը տեղի է ունենում այս տարի: Եվ գիտենք, որ այս վիճակը եզակի է վերջին տարիների ընթացքում: Մի կապեք Մաքսային միությունը իրավիճակի հետ, որը տեղի է ունենում 2015 թվականին: 2015 թվականի իրավիճակն ազդելու էր Հայաստանի վրա՝ անկախ նրանից՝ մենք Մաքսային միության մե՞ջ էինք, թե՞ ոչ»,- եզրափակեց նախարարը:
