Թուրքական Hürriyet թերթի փոխանցմամբ՝ Թուրքիայի էներգետիկայի ու բնական պաշարների նախարար Թաներ Յըլդըզը հայտարարել է, որ անհնար է չեղյալ հայտարարել միջերկրածովյան Աքքույու վայրում Թուրքիայի առաջին ատոմակայանի կառուցման մասին համաձայնագիրը:
Յըլդըզն ընդգծել է, որ դա արդեն միջազգային համաձայնագիր է և պետական քաղաքականության մաս: Յըլդըզը նման կերպ է պատասխանել ընդդիմադիր «Ժողովրդահանրապետական» կուսակցությանը (ԺՀԿ), որը հայտարարել էր, որ իրենք չեղյալ են հայտարարելու Աքքույուի ատոմակայանի վերաբերյալ Ռուսաստանի հետ կնքված համաձայնագիրը:
Յըլդըզը հայտարարել է, որ նման կարգի համաձայնագրերը չեն կարող չեղյալ հայտարարվել:
Հիշեցնենք, որ Աքքույուի ատոմակայանի կառուցման ու շահագործման մասին պայմանագիրը Ռուսաստանն ու Թուրքիան ստորագրել են 2010 թվականին: Աքքույուի ատոմակայանն ունենալու է 4 էներգաբլոկ, որոնցից յուրաքանչյուրի հզորությունը կազմելու է 1200 մեգավատտ: Նախագիծը գնահատվում է մոտ 20 միլիարդ դոլար։
