ԺԿ առաջնորդ Տիգրան Կարապետյանը վստահեցրեց, որ մայիսի 3-ի իրենց հանրահավաքին արտահայտելու են իրենց մոտեցումները, որոնք կլինեն «որոշակիորեն վճռական, ավելի խիստ»:
Նրա խոսքերով, ժողովրդի մեջ կա ստվար զանգված, որը չի ընդունում ո՛չ Լևոն Տեր-Պետրոսյանին, ո՛չ Սերժ Սարգսյանին, և այդ զանգվածը պետք է իր նախապատվությամբ առաջնորդվի, ոչ թե որևէ մեկին սատարի:
Կարապետյանը նաև շատ հետաքրքիր հայտարարություն արեց. «Ընտրության մասին ո՞վ է խոսում, ես չեմ պատրաստվում ընտրության գնալ, որովհետև նախընտրական գոծընթաց չկա, եթե լինի, ապա կարող է լինել արտահերթ: Արտահերթ ընտրություններ եթե լինեն, դա կլինի ինչ-որ պայմանավորվածության ներքո»:
Այստեղ ևս ԺԿ առաջնորդը չմոռացավ Հայ ազգային կոնգրեսին և նշեց, որ, ի տարբերություն նրանց, իրենք պահանջում են խորհրդարանական, հետո նախագահական. «ՀԱԿ-ն ասում է, որ պիտի լինի նախագահական, հետո նոր խորհրդարանական: Հետաքրքիր է, ՀԱԿ-ը պնդելո՞ւ է, որ սկզբից լինելու են նախագահական ընտրություններ, թող պնդի` մենք էլ դա տեսնենք, ամեն անգամ չէ, որ հանրահավաքից առաջ վճռական գործողություններ են խոստանում»:
Անդրադառնալով ՀԱԿ-«Ժառանգություն» լարված հարաբերություններին, Կարապետյանը նշեց, թե ցավ է ապրում, որ ՀԱԿ-ը պայքարում է իրենց դեմ, ոչ թե իշխանությունների. «Իրական ընդդիմությունը ժողովուրդն է, եկեք միանգամից դա արձանագրենք, ոնց կարող է իշխանավորը լինել ընդդիմություն, թեկուզ՝ նախկին իշխանավորը»:
Իսկ խոսելով ժառանգական Ռուբեն Հակոբյանի այն կարծիքի մասին, թե Լևոն Տեր-Պետրոսյանը պետք է Արթուր Բաղդասարյանից ներողություն խնդրի՝ Տիգրան Կարապետյանը ասաց. «Ես չէի ասի, չի կարելի Լևոն Տեր-Պետրոսյանին համեմատել Արթուր Բաղդասարյանի հետ: Չեմ բացառում, որ կուլիսներում բանակցություններ ընթանում են, բայց կարծում եմ, որ յուրաքանչյուր բանակցություն պետք է հասանելի լինի ժողովրդին»:
Կարապետյանի խոսքերով, ՀԱԿ-ը չի ժխտում, որ իրենք պայմանավորվածության մեջ են իշխանությունների հետ, բայց ինքը չէր ցանկանա, որ որևէ ուժ իշխանության հետ պայմանավորվեր. «Իշխանության հետ մի պայման կա` ժողովուրդը նորմալ ապրի»:
