Մենք տեղեկացրել ենք, որ մայիսի 15-ին իր մոտ հրավիրված խորհրդակցության ժամանակ ԱԺ նախագահ Գալուստ Սահակյանը խոստացել էր խորհրդարանական լսումներ կազմակերպել ՀԷՑ կողմից էլեկտրաէներգիայի սակագինը թանկացնելու հայցը քննարկելու համար: Մեր տեղեկություններով՝ նախնական պայմանավորվածություն է ձեռք բերվել, որ խորհրդարանական լսումները տեղի կունենան հունիսի 12-ին:
Հանրային ծառայությունները կարգավորող հանձնաժողովի նախագահ Ռոբերտ Նազարյանը պատգամավորներին հայտնել է, որ ՀԷՑ-ի կողմից ՀԾԿՀ ուղարկված հայտի մեջ իրեն ևս որոշ անհասկանալի և մտահոգող հարցեր են եղել, և ինքը նամակով դիմել է ՀԷՑ ղեկավարությանը հավելյալ պարզաբանումներ ստանալու նպատակով: Երբ այդ պարզաբանումները լինեն, այն ժամանակ էլ Նազարյանը պատրաստ կլինի ներկայանալ խորհրդարան և պատասխանել պատգամավորների հարցերին:
Հայաստանի խորհրդարանականները մտածում են, որ էլեկտրաէներգիայի թանկացման դեմ պայքարը չափազանց լավ առիթ է սեփական վարկանիշը բարձրացնելու համար: ՀԷՑ-ին քննադատելը անշառ գործ է, և դրա համար որևէ մեկը չի նեղանա: Բացի այդ, չկա մի մարդ, ով կողմ լինի էլեկտրաէներգիայի թանկացմանը, իսկ դա նշանակում է, որ ով դրա դեմ ավելի ակտիվ ու ավելի վճռական պայքարի, հենց նա էլ կդառնա հանրության սիրելին:
Ավելին՝ պատգամավորները համոզված են, որ էլեկտրաէներգիան չի թանկանալու ՀԷՑ հայցի շրջանակներում՝ 17 դրամ, նրանք կանխատեսում են, որ թանկացումը կարող է լինել 6-7 դրամի սահմաններում, և այդ դեպքում իրենք կարող են արձանագրել, որ այդ խոշոր հաղթանակն արձանագրվեց նաև իրենց վճռական և անզիջում պայքարի շնորհիվ: Որոշ պատգամավորներ նույնիսկ պնդում են, որ այս պահին կարելի է էլեկտրաէներգիայի սակագինը չբարձրացնել ընդհանրապես, ինչը հանրության համար լուրջ ոգևորության առիթ կլինի:
Բայց իրականությունը բոլորովին այլ բան է: Ո՛չ Հայաստանի խորհրդարանը և ո՛չ էլ Հայաստանի իշխանություններն ընդհանրապես չեն կարող պայքարել ՀԷՑ-ի և նրա կողմից իրականացվող, այսպես կոչված, վատ կառավարման դեմ: Ճիշտ է, ՀԷՑ-ը պատկանում է ռուսական «Ինտեր ՌԱՕ ԵԷՍ» ընկերությանը, սակայն ՀԷՑ-ի ամենաբարձր օղակներում տեղավորված են Հայաստանի բարձրաստիճան պաշտոնյաների երեխաները, ազգականներն ու մտերիմները: Ռուսները ՀԷՑ-ի վատ կառավարումն իրականացնում են ոչ թե միայնակ այլ հայ գործընկերների հետ համատեղ: Եվ հիմա հայ գործընկերները, ովքեր տարիներ շարունակ օգտվել են այդ վատ կառավարման արդյունքներից, չեն կարող բողոքել և առավել ևս պատժել ՀԷՑ ղեկավարությանը վատ կառավարման համար: Ավելին՝ նրանք շահագրգռված են էլեկտրաէներգիայի թանկացմամբ, քանի որ այդ դեպքում ավելանալու է վատ կառավարման հնարավորությունը:
Հենց սրանով է պայմանավորված այն հանգամանքը, որ Հայաստանի բոլոր պաշտոնյաները, ովքեր զբաղված են այս ոլորտի համակարգմամբ՝ միաբերան պնդում են, որ էլեկտրաէներգիայի թանկացումը այլընտրանք չունի, որ էլեկտրաէներգիան թանկանալու է ինչպես այս տարի, այնպես էլ հաջորդ և հետագա բոլոր տարիներին՝ այդպիսով արդարացնելով ՀԷՑ գործունեությունը: Բայց ինչպես նշեցինք, հայ պատգամավորները սրա մասին կգերադասեն լռել, և նրանց քննադատության թիրախը կլինի ՀԷՑ գլխավոր տնօրեն Եվգենի Բիբինը, մարդ, որը այս ամենի հետ, իհարկե, կապ ունի, բայց թերևս անհամեմատ ավելի քիչ, քան հայ պաշտոնյաներից շատերը:
