Ստամբուլի ոստիկանական վարչության հետախուզության բաժնի նախկին ղեկավար Ալի Ֆուաթ Յըլմազերը ձերբակալվել է 2007 թ. «Ակօս» շաբաթաթերթի խմբագրապետ, հասարակական գործիչ Հրանտ Դինքի սպանության գործով: Այս մասին հայտնում է Anadolu գործակալությունը:
Հիշեցնենք, որ «Ակօս» շաբաթաթերթի նախկին խմբագրապետ, հասարակական գործիչ Հրանտ Դինքը սպանվել է 2007 թվականի հունվարի 19-ին Ստամբուլում։ 5 տարի շարունակվող կողմնակալ և բազմաթիվ քննադատությունների արժանացած դատավարությունից հետո` 2012 թվականի հունվարի 17-ին, հրապարակվեց առաջին դատավճիռը։ Սպանությունն իրականացրած Օգյուն Սամասթը, որի գործը քննում էր Անչափահասների գործերով դատարանը, դատապարտվեց 21 տարի 6 ամիս ազատազրկման։ Դինքի սպանության մասնակիցներից Յասին Հայալը դատապարտվեց ցմահ ազատազրկման։ Սպանության կազմակերպիչներից Էրհան Թունջելը Դինքի սպանության առաջին գործով անմեղ է ճանաչվել, սակայն երկրորդ գործով կալանավորված է։
Ստամբուլի դատարանը լսել է Դինքի սպանության գործով Յըլմազերի ցուցմունքները և վճռել է նրան կալանավորել «հանցավոր կազմակերպության ստեղծման», նաև «հանցակցության ու դրդման» մեղադրանքով:
