Հունաստանի և Իրանի արտգործնախարարներ Նիկոս Կոտզիասը և Մոհամադ Ջավադ Զարիֆը քննարկել են էներգետիկ համագործակցությունը և հունական առևտրական նավատորմի կիրառման հնարավորությունը՝ նավթի ու հեղուկ գազի տեղափոխման համար: Այս մասին գրում է RIA Novosti-ն:
Զարիֆն Աթենք է այցելել ուրբաթ օրը Ժնևում Իրանի միջուկային ծրագրի հարցով վերսկսվող բանակցություններից առաջ: Իրանի ԱԳ նախարարը բանակցություններ կանցկացնի նաև Հունաստանի վարչապետ Ալեքսիս Ցիպրասի հետ։
Կոտզիասի խոսքով՝ Զարիֆի հետ հանդիպման ժամանակ քննարկվել է քաղաքական և մշակութային համագործակցության խորացման անհրաժեշտությունը, ինչպես նաև մեծ նշանակություն է տրվել տնտեսական և էներգետիկ ոլորտներում համագործակցությանը: Նա ասել է, որ մի քանի օր առաջ հաստատել է Թեհրան-Աթենք առանց տեղափոխման չվերթների մեկնարկը:
«Հունաստանի և Իրանի միջև էներգետիկ հարաբերությունների զարգացումը հնարավոր է և ցանկալի: Իրանն ունի բարձրորակ գազի և հատկապես նավթի մեծ պաշարներ, իսկ Հունաստանը՝ աշխարհագրական տեսանկյունով, ներկայացնում է մուտքը Եվրամիություն: Հունաստանը, ավելի ճիշտ՝ հույն նավատերերը, մեծ նավատորմ ունեն՝ հեղուկ գազի և նավթի տեղափոխման համար: Ես կարծում եմ, որ երկու երկրների համագործակցությունը դրական արդյունք կունենա ոչ միայն էներգետիկ ոլորտում, այլև տրանսպորտի»,- ասել է նա:
