Վրացական Apsny.ge կայքի փոխանցմամբ, Վրաստանի նախկին նախագահ Էդուարդ Շևարդնաձեն գործող նախագահ Միխեիլ Սաակաշվիլիին խորհուրդ է տվել անձնական հանդիպում ունենալ Ռուսաստանի նախագահ Դմիտրի Մեդվեդևի հետ.
«Դա Վրաստանի խնդիրների լուծման միակ ճանապարհն է: Ռուսաստանը շատ ազդեցիկ երկիր է, որպեսզի որևէ մեկը կարողանա նրա վրա ճնշում գործադրել` հօգուտ Վրաստանի: Եթե ես լինեի Վրաստանի նախագահը, ապա կմեկնեի Մոսկվայի և կհասնեի Մեդվեդևի հետ անձնական հանդիպմանը: Ես Ռուսաստանը չէի լքի այնքան ժամանակ, քանի դեռ չէր կայանա այդ հանդիպումը:
Հենց Ռուսաստանը կարող է հանդիսանալ Վրաստանի տարածքային ամբողջականության երաշխավորը: Ճիշտ է` այսօր Մեդվեդևը չի ցանկանում հանդիպել Սաակաշվիլիի հետ, սակայն այդ ուղղությամբ պետք է քայլեր ձեռնարկել:
Պետք է ուշադրություն դարձնել այն բանին, որ անգամ Հաագայի դատարանը չցանկացավ քննել Ռուսաստանի դեմ Վրաստանի հայցը: Դա ևս մեկ անգամ խոսում է աշխարհի վրա Մոսկվայի ունեցած ազդեցության մասին, և Վրաստանն ստիպված է հաշտվել դրա հետ»:
Հիշեցնենք, որ մարտի վերջին էլ Շևարդնաձեն հայտարարել էր, թե Սաակաշվիլին դեռևս արժանի չէ բռնապետ կոչվելուն, բայց եթե նա երկար ժամանակ մնա իր ներկայիս պաշտոնին, ապա նրա մոտ կարող են ի հայտ գալ բռնապետական հակումներ:
