Վրացական Apsny.ge կայքիփոխանցմամբ, ընդդիմադիր «Ժողովրդավարական շարժում-Միասնական Վրաստան» կուսակցության և «Ժողովրդական հավաք» կազմակերպության առաջնորդ, խորհրդարանի նախկին խոսնակ Նինո Բուրջանաձեն վրացական իշխանություններին մեղադրել է ընդդիմության շարքերը լրտեսներով համալրելու մեջ:
Բուրջանաձեի խոսքերով` իշխանությունները պատրաստվում են սադրանքների գնալ ընդդիմության նկատմամբ, որը պատրաստվում է մայիսի 2-ին դուրս գալ փողոցներ և սկսել հեղափոխական գործընթացը.
«Իշխանությունները խիստվախենում են ժողովրդական հավաքներից, դրա համար էլ իրենց գործակալներին ներառում են ընդդիմության շարքերում, որպեսզի հետագայում նրանց ձերբակալեն և ստանան անհրաժեշտ ցուցմունքներ: Դրանցում խոսք կգնա այն մասին, որ ընդդիմությունը մտադիր էր «Լոնդոնից մինչև Բոմբեյ (Մումբայ) թունել կառուցել»: Դա գործակալների սովորական աշխատանքն է:
Մի շարք ընդդիմադիր կուսակցությունների գործունեությունը ձեռնտու է բռնապետ դարձած Միխեիլ Սաակաշվիլիին: Այդ կուսակցությունները պատրաստվում են հանպատրաստից դուրս գալ փողոց և պահանջել արտահերթ խորհրդարանական ընտրություններ: Դա Սաակաշվիլիին ձեռնտու է, քանի որ այդպիսի պայմաններում ընդդիմությունը ոչնչի չի հասնի:
Մինչդեռ մենք մարդկանց դուրս կբերենք փողոց, սակայն մտադիր չենք նրանց մեկ շաբաթ պահել այնտեղ: Մենք ունենք հստակ և նախապես մշակված ծրագիր: Մենք պետք է հավաքենք հնարավորինս շատ մարդկանց, որպեսզի դրանով իսկ խուսափենք հնարավոր արյունահեղությունից և Սաակաշվիլիին ստիպենք խաղաղ կերպով հրաժարական տալ: Դրանից հետո երկրում կարելի կլինի անցկացնել ազատ ընտրություններ»:
Հիշեցնենք, որ երկու օր առաջ Բուրջանաձեն հայտարարել էր, որ ներկայիս Վրաստանին անհրաժեշտ է հեղափոխություն. «Մենք մտադիր չենք սպասել 2012 թվականի խորհրդարանական ընտրություններին: Եթե իշխանությունները ժողովրդին այլ ելք չթողնեն, ապա դա տեղի կունենա:
Սակայն ժողովրդական հուզումների ժամանակ Սաակաշվիլին չպետք է կրկնի Լիբիայի առաջնորդ Մուամար Քադաֆիի սխալները և զենք կիրառի խաղաղ քաղաքացիների դեմ: Եթե զենք կիրառվի, ապա դա կարագացնի Սաակաշվիլիի վախճանը»: