Նյու Յորքի ժամանակակից արվեստների Frieze Art Fair տոնավաճառում նկարիչ Ռիչարդ Պրինսը Լարի Գագոսյանի պատկերասրահում 37 աշխատանքի ցուցահանդես է կազմակերպել: Նա Instagram-ից վերցրել է լուսանկարներ և մեկնաբանություններով հանդերձ տպել հսկայական պաստառների վրա: Այս մասին հայտնում է newsru.com-ը:
Այդ աշխատանքներից մեկը վաճառվել է 90 հազար դոլարով: Դրա մասին նկարում պատկերված աղջիկը իմացել է իր ընկերներից: Աղջիկը սոցցանցի իր էջում հայտնել է, որ թույլտվություն չի տվել նկարչին, բայց և չի պատրաստվում նրան դատի տալ:
Ռիչարդ Պրինսն արդեն դարձել է դատական հետապնդումների օբյեկտ ուրիշների լուսանկարները օգտագործելու համար: Նրա դեմ բողոքել է ֆրանսիացի լուսանկարիչ Պատրիկ Քարյուն: Սկզբից փաստերը Քարյուի օգտին էին, սակայն հետագայում դատարանը վերանայեց գործը և հայտարարեց, որ լուսանկարներից 25-ում փոփոխությունները բավարար են, որպեսզի դրանք համարվեն արվեստի նոր ստեղծագործություն:
