Արևելյան Անգլիայի համալսարանից գիտնականների խումբը Nature ամսագրում հոդված է հրապարակել, որի համար նյութ է դարձել 10 տարվա հետազոտությունը: Նպատակն է եղել պարզել՝ ինչու է բնությունը կենդանական աշխարհում երկու տարբեր սեռեր ստեղծել, չէ՞ որ տղամարդու դերը մեծ մասամբ կնոջ բեղմնավորման, սերունդ ստանալու համար է: Մինչդեռ շատ օրգանիզմներ մոլորակի վրա առանց դրա են գոյատևում, օրինակ՝ մի շարք միջատներ, սողուններ և նույնիսկ շնաձկներ կարող են ինքնուրույն վերարտադրվել:
«Բոլոր ժառանգների միայն կեսն են աղջիկ, որոնք կկարողանան իրենց հերթին սերունդ տալ: Այդ դեպքում ինչո՞ւ ուժ ծախսել տղա ունենալու վրա»,- ասում է հետազոտական խմբի ղեկավար, պրոֆեսոր Մեթ Գեյջը:
Փորձի շրջանակներում գիտնականները լաբորատորիայում ալյուրի բզեզներ են աճեցրել ու հետևել դրանց էվոլյուցիային: Կենսաբանները միջատներին դրանց վերարտադրողական շրջանում բաժանել են մի քանի խմբի, մեծացրել կամ փոքրացրել են սեռական ընտրության ինտենսիվությունը: Որոշ դեպքերում 90 արուին բաժին է հասել 10 էգ:
Հաշվի առնելով, որ ալյուրի բզեզը մոնոգամ է՝ միայն էգը 8 արուի հետ է կապվել: Մոտ 50 սերնդից հետո գիտնականներն ուսումնասիրել են դրանց գենետիկան և առողջությունը: Պարզվել է՝ որքան շատ «տղամարդ» է եղել, այնքան լավն են եղել բզեզների գենետիկան և առողջությունը: Բեղմնավորման համար մրցակցությունը պոպուլյացիայի ներսում բերել է նրան, որ այն ավելի կենսունակ է դարձել:
«Տղամարդկային մրցակցությունը սերնդի ծնվելու համար իսկապես կարևոր դեր ունի: Հենց նրա շնորհիվ է ապահովվում պոպուլյացիայի գենետիկ առողջությունը: Սեռական ընտրությունը նման է ֆիլտրի, որը դեն է նետում բոլոր վնասակար գենետիկ մուտացիաները և պոպուլյացիային օգնում է բարգավաճել ու խուսափել անհետացումից երկարաժամկետ հեռանկարում»,- եզրակացրել է Գեյջը:
