Ռուսական Lenta.ru կայքի փոխանցմամբ, Ադրբեջանում քրեական գործ է հարուցվել մարտի 17-ին հայկական գերությունից Ադրբեջան վերադարձած ադրբեջանական բանակի սերժանտ Անար Հաջիևի դեմ: Մեղադրանք է առաջադրվել քրեական օրենսգրքի 272-րդ հոդվածով (հայրենիքի դավաճանություն):
Ադրբեջանի «Կտտանքների դեմ կոմիտե»-ի նախագահ Էլչին Բեհբութովի խոսքերով, Հաջիևն իրեն արդեն մեղավոր է ճանաչել և ցավում է տեղի ունեցածի համար: Նրան փաստաբան է տրամադրվել: Միևնույն ժամանակ, Բեհբութովը չի նշել, թե որն է ադրբեջանցի սերժանտի մեղքը:
Իրավապաշտպանի փոխանցմամբ, Հաջիևի ճակատագրին կարող են արժանանալ ևս երկու զինծառայողներ, ովքեր, հավանաբար, նույնպես վերադարձել են հայկական գերությունից:
Հիշեցնենք, որ Հաջիևը գերի է ընկել 2009 թվականի մայիսի 10-ին: Մարտի 17-ին հայ-ադրբեջանական շփման գծում նրան փոխանակել էին Տավուշի մարզի բնակիչ Արթուր Բադալյանի հետ: