Մի քանի մլրդ տարի առաջ Երկիրը եղել է ձնագունդ՝ հայտնում է «Ռոսիսկայա գազետան»: Գիտնականներն այսպիսի եզրակացության են եկել՝ ուսումնասիրելով Ռուսաստանի հյուսիս-արևմուտքում հայտնաբերված 2.4 մլրդ տարեկան ապարները: Այն ժամանակ այդ տարածքները եղել են հասարակածին մոտ: Այստեղից եզրակացություն. Երկիրը եղել է գունդ՝ ամբողջովին պատված սառույցով:
Պետք է նշել, որ արդեն ավելի քան 50 տարի գոյություն ունի այն հիպոթեզը, որ Երկիրն ամբողջովին սառցապատ է եղել, բայց մոտ 500-700 մլն տարի առաջ: Նոր հետազոտությունն այդ ժամանակը մոտ մեկուկես մլրդ տարով հետ է տանում:
«Մեծաթիվ աշխատանքները ցույց են տալիս, որ երկրի բացարձակ սառցակալում երբեք չի եղել,- ասում է Ռուսաստանի գիտությունների ակադեմիայի Աշխարհագրության ինստիտուտի տնօրենի տեղակալ Արկադի Տիշկովը:- Նույնիսկ ամենացուրտ ժամանակ սառույցը խճանկարի նման է տարածված եղել և երբեք ամբողջովին չի ծածկել Երկիրը»:
Այս հիպոթեզի դեմ վերջին փաստարկը 2011-ին ներկայացրել են ամերիկացի երկրաբանները։ Նրանք Բրազիլիայի ստորին լայնություններում հայտնաբերել են հնագույն սառցադաշտերի հետքեր։
Գիտնականները պարզել են, որ մթնոլորտում ածխաթթու գազի պարունակությունը զգալիորեն քիչ է եղել, քան մինչ այժմ էր համարվում:
Դա, իր հերթին, ցույց է տալիս, որ սառցակալումն այդքան էքստրեմալ չի եղել: Մասնավորապես, հնարավոր է՝ հասարակածի շրջանում պահպանվել է հեղուկ ջրի օվկիանոս: Դա օգնում է բացատրել, թե ինչպես են կենդանի օրգանիզմները ողջ մնացել այդքան էքստրեմալ եղանակային պայմաններում:
