Մեկ շաբաթից գումարվում է Եվրոպական միության Արևելյան գործընկերության Ռիգայի գագաթնաժողովը, որի ընթացքում Եվրամիությունը կարող է ստորագրել Հայաստանի հետ նոր փաստաթուղթ։ Այն, իհարկե, տարբերվելու է Ասոցացման պայմանագրից, որից Հայաստանը հրաժարվել է։
Արևելյան գործընկերության վեցնյակը, փաստորեն, բաժանվել է երկու եռյակի` Ուկրաինան, Մոլդովան և Վրաստանը, չնայած Ռուսաստանի ճնշումներին, շարունակում են առաջ գնալ եվրաինտեգրման ճանապարհով, Հայաստանը, Բելառուսը և Ադրբեջանը հետ են մնացել։
Ինչպես հայտնում է «Ազատություն»-ը՝ Եվրախորհրդարանի և Արևելյան գործընկերության «Եվրանեսթ» խորհրդարանական վեհաժողովի պատգամավոր, Ռումինիայի լիբերալ դեմոկրատական աջակենտրոն կուսակցությունը ներկայացնող Տրայան Ունգուրյանուի համոզմամբ՝ Բրյուսելում կա Հայաստանի խնդիրների շատ սխալ ըմբռնում։ Այն ծագել է Եվրասիական տնտեսական միությանն անդամակցելու վճռից հետո, Եվրամիությունում շատերը չեն գիտակցում, որ այդ վճիռն ընդունվել է զուտ պրագմատիկ դրդապատճառներով և Ռուսաստանի հուժկու ճնշումների արդյունքում։
«Դա ընկալվել է իբրև յուրօրինակ դավաճանություն, ինչը, իմ համոզմամբ, բացարձակ սխալ է։ Հայաստանը անհրաժեշտ է դիտել իր քաղաքական և ռազմավարական խնդիրների ամբողջ համատեքստում։ Եվ որևէ պարագայում չի կարելի կասկածի տակ առնել Հայաստանի մշակութային, պատմական, կրոնական խորը կապը Եվրոպայի հետ», – ասել է Ունգուրյանուն և ավելացրել. – «Այս տեսակետից կան շատ քիչ երկրներ, որոնք իրապես պետք է ունենան եվրոպական հեռանկար, Հայաստանը պատմականորեն պատկանում է Եվրոպային»։
Ըստ ռումինացի քաղաքական գործչի, եվրոպական ինտեգրման խնդիրը հարկ է պահել օրակարգում, այն փաստը, որ Հայաստանն արել է ոմանց տեսակետից «սխալ ընտրություն», չի նշանակում, թե Բրյուսելը չպետք է պահպանի Հայաստանի հետ ակտիվ, իրական երկխոսություն, որի վերնանպատակը եվրոպական հեռանկարն է լինելու։
«Որքա՞ն հեռու կգնա Ռուսաստանը նախկին խորհրդային տարածքում եվրոպամետ միտումները լռեցնելու գործում»․ – Տրայան Ունգուրյանուն շատ հստակ պատասխան է տալիս այդ հարցին. – «Այնքան հեռու, որքան Եվրոպան թույլ կտա: Քանի դեռ Բրյուսելից, Փարիզից, Լոնդոնից, Բեռլինից հասնում են հստակ քայլերից խուսանավելու մասին վկայող ազդակներ, Մոսկվան վստահ շարունակում է այսօրվա քաղաքականությունը»։
Ունգուրյանուի խոսքով՝ լուծման բանալին Բրյուսելում է, այստեղ պետք է կայացնեն վճռական քայլեր։
Նրա համոզմամբ՝ ուսանելի է Մոլդովայի փորձը, այդ երկիրը հաղթահարել է բոլոր ճնշումները, կատարել է իր «տնային աշխատանքը»։ Արդյոք Ռիգան կընդունի կարևոր որոշումներ՝ Ունգուրյանուն համոզված չէ, բայց հույսեր ունի։
