Մոսկվայի քաղաքային դատարանը մայիսի 25-ին կստուգի հայ գործարար Լևոն Հայրապետյանին տնային կալանքի տակ պահելու օրինականությունը: Այս մասին RIA Novosti-ին հայտնել է դատարանի ներկայացուցիչ Աննա Ֆադեևան:
Հետաքննիչի միջնորդությամբ Հայրապետյանի տնային կալանքի ժամկետը նշանակված է մինչև հուլիսի 28-ը, փաստաբանները բողոքարկել են այդ որոշումը:
Հիշեցնենք՝ ավելի վաղ հայտնի դարձավ, որ Լևոն Հայրապետյանի գործն առանձնացվել է «Բաշնեֆտի» ընդհանուր գործից, և գործում միայն մեկ դրվագ է մնացել:
«Մեր գործն առանձնացվել է, և մեզ մոտ մնացել է միայն (Իգոր) Իզմեստևից (սպանությունների կազմակերպման համար դատապարտված նախկին սենատոր) միջոցների գողության դրվագը»,- ասել էր պաշտպանը Մոսկվայի Բասմանի դատարանի նիստում:
Այդպիսով, Հայրապետյանին ներկայացված մեղադրանքները մեղմացվել են:
Լ. Հայրապետյանը ձերբակալվել էր 2014թ. հուլիսի 15-ին Մոսկվայի «Դոմոդեդովո» օդանավակայանում։ Նա մեղադրվում էր «Բաշնեֆտ» ընկերության սեփականաշնորհման գործով հանցավոր ճանապարհով ձեռք բերված փողերի վատնման և լվացման համար: Գործարարի ձերբակալման համար հիմք էին ծառայել Բաշկիրիայից նախկին սենատոր Իգոր Իզմեստևի ցուցմունքները: Վերջինս ցմահ բանտարկություն է կրում մի շարք առանձնապես ծանր հանցագործությունների համար։
