Ադրբեջանական Salam News կայքի փոխանցմամբ, TÜRKSAM միջազգային հարաբերությունների և ռազմավարական հետազոտությունների կենտրոնի ղեկավար, ադրբեջանական ծագում ունեցող Սինան Օղանը հայտարարել է, որ խորհրդարանում ընտրվելու դեպքում պաշտպանելու է Ադրբեջանի շահերը:
Նշվում է, որ Սինան Օղանի թեկնածությունն առաջադրվել է Իգդիրում` «Ազգայնական շարժում» կուսակցության (ԱՇԿ) կողմից:
Օղանը հայտարարել է. «Պատգամավոր դառնալու իմ ձգտումը պայմանավորված է ղարաբաղյան հակամարտության կարգավորմանը, Մեծամորի ատոմայանի փակմանը, ինչպես նաև Իգդիրի սոցիալ-տնտեսական կյանքին առնչվող խնդիրների լուծմանը նպաստելու ցանկությամբ:
Պատգամավոր ընտրվելու դեպքում ես մտադիր եմ թուրքական խորհրդարանում կանոնավոր բարձրացնել ղարաբաղյան հիմնախնդրի և Թուրքիայի ու Ադրբեջանի հանդեպ Հայաստանի վարած «թշնամական» քաղաքականության հարցերը:
Բացի այդ, մենք ձեռնարկելու ենք հնարավոր ամեն ինչ` Մեծամորի ատոմակայանի փակմանը հասնելու համար, որը «լուրջ սպառնալիք» է ողջ տարածաշրջանի համար: Ճապոնիայում տեղի ունեցած ուժգին երկրաշարժի և ցունամիի արդյունքում «Ֆուկուսիմա-1» ատոմակայանում տեղի ունեցած վթարից հետո այս խնդիրն էլ ավելի այժմեականություն է ձեռք բերել:
Իգդիրը Թուրքիայի և Ադրբեջանի միջև ընկած մի դուռ է և յուրօրինակ կամրջի դեր է խաղում երկու երկրների միջև: Մենք մեծ ուշադրություն ենք հատկացնելու Իգդիրի սոցիալ-տնտեսական խնդիրներին»:
Հիշեցնենք, որ Սինան Օղանը ծնվել է հենց Իգդիրում, ուր կա մեծաթիվ ադրբեջանական բնակչություն (որոշ տվյալներով՝ մինչև 70 տոկոսը): Դա զգալիորեն մեծացնում է նրա ընտրության հավանականությունը:
Ի դեպ, Սինան Օղանը բազմիցս Մեծամորի ատոմակայանն անվանել է «Հայկական Չեռնոբիլ»` նշելով, որ դրա գործունեության արդյունքում Իգդիրում «ավելացել» է խեղված նորածինների թիվը:
Իսկ այս տարվա հունվարի սկզբին Օղանը հայտարարեց, որ հայ-թուրքական սահմանի բացումը ոչ միայն «որևէ օգուտ չի տա» Իգդիրին, այլև «վերջ կդնի» Իգդիրի գյուղատնտեսությանն ու անասնապահությանը: