Այսօր հրավիրված ասուլիսի ընթացքում ՀՀ կառավարության կողմից «Մեկ ազգ, մեկ մշակույթ» հիմնադրամի գործադիր տնօրեն Թամարա Պողոսյանը բացեց իր և Հրանուշ Հակոբյանի միջև ծագած հակամարտության չակերտները: Ի դեպ, մամուլի ասուլիսին հրավիրվել էր նաև Հրանուշ Հակոբյանը, ընդհուպ՝ խնդրել էին ներկայանալ փոխնախարարի մակարդակով, բայց ոչ մեկը չէր ներկայացել:
Թամարա Պողոսյանի խոսքերով, հանպատրաստից, անակնկալ ձևով Հրանուշ Հակոբյանը իրենից հաշվետվություն է պահանջում հիմնադրամի գործունեության վերաբերյալ, ինչը, Թամարա Պողոսյանի դիտարկմամբ, կարճ ժամանակահատվածում անհնար է իրականացնել: Բարոյահոգեբանական ճնշման մթնոլորտում Թամարա Պողոսյանը հայտնվում է հիվանդանոցում, իսկ Հրանուշ Հակոբյանը հոգաբարձուների նիստ է հրավիրում: Թամարա Պողոսյանը խնդրում է նիստը հետաձգել, բայց Հրանուշ Հակոբյանը ասում է՝ «ինչ հետաձգել, ինչ բան, թղթերը հավաքիր, արի էստեղ»:
Առողջական խնդիրներից ելնելով՝ Թամարա Պողոսյանը չի ներկայանում այդ նիստին: Հոգաբարձուների նիստը Հրանուշ Հակոբյանը անցկացնում է, հայտնաբերում, որ հիմնադրամից 5 միլիոն դրամ գումար չկա, և պահանջում է վերադարձնել այդ գումարը: Ապաքինվելուց հետո Թամարա Պողոսյանը փորձում է հանդիպել Սերժ Սարգսյանին, սակայն նախագահի աշխատակազմի ղեկավար Կարեն Կարապետյանը առաջարկում է, որ գրավոր ներկայացնի խնդիրը, սակայն մինչ օրս Սերժ Սարգսյանը չի արձագանքել այս խնդրին: Թամարա Պողոսյանը նկատեց նաև, որ հիմնադրամը կարելի է ասել՝ լուծարված է, սակայն նա փորձելու է պաշտպանել իր շահերը իրավական հարթության վրա:
