«Պայքարի մեկ ձև գիտեմ՝ փողոցը, և Րաֆֆի Հովհաննիսյանն ամեն ինչ պետք է անի»,- այսօր «Առաջին լրատվական»-ի հետ զրույցում ասաց «Նոր ժամանակներ» կուսակցության ղեկավար, քաղաքական գործիչ Արամ Կարապետյանը՝ անդրադառնալով նախագահական ընտրություններին և հնարավոր հետընտրական զարգացումներին:
Նա նշեց, որ շատ հարցեր դեռևս իր համար պարզ չեն, քանի որ և ինքը, և ընտրությունների արդյունքում երկրորդ տեղ զբաղեցրած «Ժառանգություն» կուսակցության առաջնորդ Րաֆֆի Հովհաննիսյանն ընդդիմադիր են, և որպեսզի գործընթացին չխանգարի, ցանկանում է մի քանի հարցեր բաց թողնել:
Քաղաքական գործչի խոսքով՝ եթե հավատանք նրան, ինչն այսօր Րաֆֆի Հովհաննիսյանի կողմնակիցների կողմից տեսնում ենք Facebook-ում, եթե հավատանք խոսքերին, որ իրենք հաղթել են, որ Րաֆֆի Հովհաննիսյանն արդեն նախագահ է, ապա Րաֆֆին ու նրա կողմնակիցները մինչև վերջ պետք է պայքարեն այդ հաղթանակի համար, պայքարեն մինչև այդ կեղծիքը դառնա «ոչ», իսկ Րաֆֆի Հովհաննիսյանը՝ նախագահ:
«Ես պայքարի մեկ ձև գիտեմ՝ փողոցը, ՀՀ Սահմանադրական դատարանը, փողոցի ճնշումը, Սահմանադրական դատարանի որոշումը: Պայքարի այլ՝ իրավաբանական, հասարակական ձև ես չգիտեմ: Հիմա այս շարժումը ցույց կտա՝ գործարք եղե՞լ է, թե՞ ոչ: Հիմա Րաֆֆի Հովհաննիսյանն ամեն ինչ պետք է անի: Եկեք լավատես լինենք»,- ասաց Արամ Կարապետյանը:
Արամ Կարապետյանի դիտարկումներով՝ Րաֆֆի Հովհաննիսյանը երկու տարբերակ ունի:
«Առաջինի դեպքում, եթե պայքարի, մի քիչ բարդ է լինելու դա անել՝ ժողովրդի լայն մասնակցության առումով: Եթե պայքարի, փառք ու պատիվ իրեն՝ որևէ խնդիր չկա: Երկրորդ տարբերակով կարող է պայմանավորվել պաշտոնի շուրջ, կամ Սերժ Սարգսյանը կշարունակի իր շատ հետաքրքիր ոճով: Դա էլ մի քանի օրից կասեմ, թե ինչու են այսպիսի թվեր. շատ հետաքրքիր է պլանավորել Սերժ Սարգսյանը:
Երկու ճանապարհ կա՝ պայքարում է և ապացուցում, որ ստացել է այդ ձայները, և ազգը գնում է նրա ետևից, կամ, ըստ երկրորդ տարբերակի, մտնում է իրավական դաշտ՝ պայմանավորվածությունների»,- մեկնաբանեց ՆԺԿ ղեկավարը՝ եզրափակելով, որ պայքարի ճանապարհին պատրաստ է Րաֆֆի Հովհաննիսյանին աջակցել:
Լուսանկարը՝ PanARMENIAN Photo-ի
