Ջուլիան Ասանժը կարող է ազատ արձակվել՝ դառնալով քաղաքական գործիչ: Բրիտանական The Guardian թերթի հաղորդմամբ՝ WikiLeaks-ի հիմնադիրը մտադիր է համանուն կուսակցություն հիմնել, որպեսզի հավակնի Ավստրալիայի սենատորի պաշտոնին՝ դրա հետ նախատեսվող անձեռնմխելիության հետ, հայտնում է vesti.ru-ն:
Սենատի ընտրությունները տեղի կունենան 2013-ի սեպտեմբերին: Նախընտրական քարոզարշավին Ասանժը, ամենայն հավանականությամբ, հեռակա կերպով կմասնակցի: Նա արդեն կես տարուց ավելի է՝ ապրում է Լոնդոնում Էկվադորի դեսպանատանը: Հարավամերիկյան պետությունը նրան քաղաքական ապաստան է տրամադրել, բայց դեսպանատնից դուրս գալ նա չի կարող:
Ասանժին բռնաբարության մեղադրանքով Շվեդիային արտահանձնում է սպառնում: Նրան ձերբակալելու համար Էկվադորի դեսպանատան մոտ շուրջօրյա հերթապահում են ոստիկանները, այդ հերթապահության վրա Բրիտանիան արդեն ծախսել է 3 մլն ֆունտ:
Ասանժը վստահ է, որ եթե իրեն հաջողվի քաղաքական կարիերա կերտել իր հայրենի Ավստրալիայում, և՛ Լոնդոնը, և՛ Ստոկհոլմը, և՛ Վաշինգտոնը, որն Ասանժին կասկածում է լրտեսության համար, կհանեն մեղադրանքները, որպեսզի խուսափեն դիվանագիտական սկանդալից: Եվ այդ ժամանակ Ասանժը կդադարեցնի դեսպանատանը կամավոր բանտարկությունը:
