Իրանի արտաքին գործերի նախարարության ներկայացուցիչ Ռամին Մեհմանպարաստը, հանդես գալով Իրանի համալսարանում, հայտարարել է, որ առաջիկա նախագահական ընտրություններից հետո Արևմուտքի երկրները ցանկանում են տեսնել անկայուն Իրան: Նա նշել է, որ այդ ընտրությունները շատ կարևոր են իրենց համար, և որ արդար ընտրությունների անցկացումը թույլ կտա Իրանին ավելի ուժեղ և անվտանգ լինել, քան նախկինում:
Նախագահական ընտրություններն Իրանում նշանակված են 2013 թ. հունիսի 14-ին: Ընտրվելու է Մահմուդ Ահմադինեժադի իրավահաջորդը, քանի որ ներկայիս նախագահն, ըստ երկրի Սահմանադրության, երրորդ անգամ վերընտրվելու իրավունք չունի:
Մեհմանպարաստն անդրադարձել է նաև Իրանի միջուկային ծրագրին` նշելով, որ «5 +1» խումբը, որի հետ Իրանը բանակցություններ է վարում, պետք է ընդունի ժողովրդի «միջուկային իրավունքը»: «Եթե մեր իրավունքներն ընդունվեն, ապա բոլոր հնարավոր հետևանքները կվերացվեն»,- ասել է նա` ավելացնելով, որ ընդհանուր համաձայնության ձեռք բերումը կողմերին կօգնի լուծել այդ խնդիրը: Նա նշել է, որ իրենք պատրաստ են բանակցությունների, սակայն իրենց բոլոր պահանջները պետք է ընդունվեն հստակ և թափանցիկ բանակցությունների շրջանակներում:
Մեհմանպարաստի խոսքերով՝ համաշխարհային տերությունները պահանջել են Իրանից փակել Ֆորդոյում գտնվող գործարանը, որպեսզի դադարեցվի ուրանի հարստացումը` խոստանալով դրա փոխարեն մեղմացնել Իրանի ոսկու գործողությունների նկատմամբ պատժամիջոցները: Նա նշել է, որ դրանով տերությունները ցանկանում են «ժողովրդի իրավունքը փոխարինել ոսկու առևտրով», ինչն իրենց համար անընդունելի էր:
ԱՄՆ-ը, մի շարք արևմտյան տերություններ և Իսրայելը Իրանին կասկածում են խաղաղ միջուկային ծրագրի քողի ներքո միջուկային զենքի մշակման մեջ: Թեհրանը հայտարարել է, որ իր միջուկային ծրագիրը բացառապես ուղղված է երկրի էներգետիկ կարիքները հոգալուն:
Միջազգային միջնորդների «վեցնյակը» (Ռուսաստան, ԱՄՆ, Չինաստան, Ֆրանսիա, Մեծ Բրիտանիա, Գերմանիա) 2003 թ. ի վեր ԱԷՄԳ-ի հետ փորձում է հասնել Իրանի կողմից ուրանի հարստացման դադարեցմանը, որը կարող է վտանգ ներկայացնել միջուկային չտարածման ռեժիմի համար:
«Վեցնյակի» հետ Իրանի բանակցությունները տեղի կունենան Ալմաթիում՝ փետրվարի 26-ին: 2012 թ. Իրանի ու «վեցնյակի» ներկայացուցիչները 3 հանդիպում են ունեցել. ապրիլի 14-ին՝ Ստամբուլում, մայիսի 23-24-ը՝ Բաղդադում և հունիսի 18-19-ը՝ Մոսկվայում: Բոլոր երեք հանդիպումներն էլ ավարտվել են առանց որևէ բեկումնային որոշման: Դրանից առաջ ավելի քան մեկ տարի բանակցություններ չէին ընթացել:
Խոսելով տարածաշրջանային վերջին իրադարձություններից՝ Մեհմանպարաստը կրկին վերահաստատել է Իրանի աջակցությունը Սիրիային` նշելով, որ նոր կառավարությունը, երբ Ասադը կլքի պաշտոնը, պետք է ընտրվի ժողովրդավարական ընտրությունների արդյունքում: Նա նշել է, որ ճգնաժամից դուրս գալու միակ ուղին դիվանագետների միջոցով բանակցություններ վարելն է և ազատ ընտրությունների անցկացումը:
