Վանաձորում ընտրությունները նորմալ, հանգիստ, առանց արտառոց դեպքերի են ընթանում: «Առաջին լրատվական»-ի հետ զրույցում նման կարծիք հայտնեց ԱԺ պատգամավոր Էդմոն Մարուքյանը:
«Հանգիստ ընտրություններ են, ոչ մի արտառոց բան չկա, եղանակն էլ լավ է, չի խանգարում, ու մարդիկ ակտիվ են»,- ասաց Մարուքյանը:
Ըստ նրա՝ տարօրինակն այն է, որ ընդդիմության վստահված անձինք գրեթե չկան: Մարուքյանը դա բացատրեց մարդկային ռեսուրսների սղությամբ:
Դիտարկմանը, որ կնիքն անձնագրի վրայից ջրով մաքրելիս ջնջվում է, պատգամավորը պատասխանեց, որ կնիքի հարցը մի քիչ ուռճացված է, քանի որ եթե կրկնաքվեարկության դեպքեր տեղի չեն ունեցել, ապա կնիքն այլևս կարևոր չէ, իսկ եթե վստահված անձինք չկան, ապա չեն էլ կարող ասել, թե կրկնաքվեարկություն է եղել:
Հիշեցնենք, որ Հայաստանի նախագահի պաշտոնին հավակնում է 7 թեկնածու՝ «Ազատություն» կուսակցության առաջնորդ, նախկին վարչապետ Հրանտ Բագրատյանը, ՀՀԿ առաջնորդ, Հայաստանի գործող նախագահ Սերժ Սարգսյանը, «Ժառանգություն» կուսակցության առաջնորդ Րաֆֆի Հովհաննիսյանը, «Ազգային ինքնորոշում միավորում» կուսակցության նախագահ Պարույր Հայրիկյանը, «Ռադիո հայ» ընկերության խորհրդի նախագահ, քաղաքագետ Անդրիաս Ղուկասյանը, ԼՂՀ ԱԳ նախկին նախարար Արման Մելիքյանը և էպոսագետ Վարդան Սեդրակյանը:
Այս ընտրությունները Հայաստանի նորանկախ պատմության ընթացքում 6-րդ նախագահական ընտրություններն են՝ 1991 թվականին (Լևոն Տեր-Պետրոսյան), 1996 թվականին (Լևոն Տեր-Պետրոսյան), 1998 թվականին (Ռոբերտ Քոչարյան), 2003 թվականին (Ռոբերտ Քոչարյան), 2008 թվականին (Սերժ Սարգսյան):
