Չի կարելի ասել, որ աշխարհում արժութային թեժ պատերազմներ են ընթանում, և չի կարելի ասել, որ արժույթների միջև առկա մրցակցությունը կենտրոնական բանկերի քաղաքականության արդյունքն է:
Ինչպես «Առաջին լրատվական»-ի հետ զրույցում հայտնեց FOREX Club-ի վերլուծաբան Միքայել Վերդյանը, խոսվում է հիմնականում երկու արժույթների մասին՝ եվրոպական և ճապոնական: Նրա գնահատականով, սակայն, եվրոն վերջին ամիսներին լուրջ պատճառներ է ունեցել արժևորման համար՝ եվրոպական կենտրոնական բանկը համապատասխան վարք ցուցաբերեց և ներդրողներն էլ ավելի մեծ վստահություն դրսևորեցին դրա հանդեպ:
Վերդյանի խոսքով՝ ընդհանուր առմամբ, արժույթի փոխարժեքը ձևավորվում է տնտեսությունում տեղի ունեցող իրադարձությունների հենքի վրա, և այդ պատճառով եվրոն գերարժևորված չէ, առավել ևս վերջին տարիներին ԱՄՆ դոլարի նկատմամբ դրա փոխարժեքը ցածր է:
Ճապոնիայի տնտեսությունը, վերլուծաբանի խոսքով, 2008-ի ճգնաժամից բավականին տուժել էր, որն ազդել էր ճապոնական իենի վրա. 1 դոլարի հարաբերությամբ իենը 75-77 էր, հիմա բարձրացել է 92, ինչը, սակայն, այնքան էլ լուրջ արժևորում չէ: Վերջին 15 տարում դոլարի նկատմամբ իենի փոխարժեքը մոտ 100-ի շուրջ էր տատանվում, և այժմ գերարժևորված կարելի է համարել, քանի որ իր միջինին չի հասել:
Մ.Վերդյանի կարծիքով՝ Մոսկվայում ուրբաթ-շաբաթ օրերին տեղի ունացած G20 երկրների ֆինանսների նախարարների հանդիպմանը արժույթների պատերազմի թեմայով սուր քննադատություն, ծայրահեղ դիրքորոշումներ չէին կարող լինել: «Շուկան ինքն արդեն գնահատել է արժույթները»,- ասաց վերլուծաբանը
Անդրադառնալով հայկական դրամին՝ Մ.Վերդյանը նշեց, որ այն առանձնապես գերարժևորված չէ, 2009-ին կտրուկ արժեզրկում եղավ, և հայկական դրամը զիջում դոլարին է: Ըստ նրա՝ ՀՀ դրամի փոխարժեքի տատանումները համարժեք են տնտեսության զարգացումներին:
«Ընդհանուր առմամբ շուկայում հավասարակշռված վիճակ է»,- կարծում է Մ.Վերդյանը՝ հավելելով, որ միջազգային ասպարեզում բացասական երևույթներ հնարավոր են, բայց լուրջ ցնցումներ և ճգնաժամ չի սպասվում:
