Ֆրանսիայի նախագահ Ֆրանսուա Օլանդը որոշել է փոխել Ֆրանսիայի իշխանության բացասական վերաբերմունքը Թուրքիայի նկատմամբ: Ուստի Ֆրանսիան ստիպված է եղել որոշակի առաջարկություններով և նախաձեռնություններով հանդես գալ Թուրքիայի ԵՄ անդամակցության վերաբերյալ՝ ցույց տալու համար, որ ոչ մի թշնամական կեցվածք չունի Թուրքիայի հանդեպ: Այս մասին այսօր «Առաջին լրատվական»-ի հետ զրույցում ասաց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը:
Նա արձանագրեց, որ այսօր Ֆրանսիայի խորհրդարանի պատգամավորների մի մասը կողմ է, մյուս մասը՝ դեմ Թուրքիայի ԵՄ անդամակցությանը: Կայծ Մինասյանը հիշեցրեց, որ Լորան Ֆաբիուսը միշտ դեմ է եղել այդ հարցին, սակայն այսօր նա ԱԳ նախարար է, ստիպված է Ֆրանսիայի դիվանագիտությունը մշակել և ղեկավարել Ֆրանսիայի նախագահ Ֆրանսուա Օլանդի գլխավորությամբ:
«Ֆրանսիայում զուգահեռաբար երկու գործընթաց է գնում, առաջինը՝ հանել Բրյուսելում Թուրքիայի ԵՄ անդամակցության բանակցությունների արգելքը, այսինքն՝ նշանակում է, որ մինչև Թուրքիան չճանաչի Կիպրոսը, որևէ բանակցային գլուխը չի կարողանա ավարտել: Ֆրանսիան ցանկանում է ցույց տալ, որ ոչ մի թշնամական վերաբերմունք, կեցվածք չունի Թուրքիայի նկատմամբ: Պատգամավորները և Օլանդը ցանկանում են նրանց անդամակցությունը ԵՄ-ին պայմանավորել մի քանի կետերի շուրջ, կա նաև Հայոց ցեղասպանության ճանաչումը և ժխտողականության օրինագիծը, սակայն պաշտոնական որևէ նախապայման չկա, նման նախապայման դրել է Եվրոպական խորհուրդը»,- մեկնաբանեց Կայծ Մինասյանը՝ շարունակելով, թե ֆրանսիացիները կարծում են, որ ավելի հեշտ և ճիշտ է այս ուղիով գնալ, քան նախորդ նախագահի քաղաքական դիրքորոշումը բռնել: Քաղաքական փորձագետի խոսքով՝ Ֆրանսիան երկու դաշտի՝ Հայաստան և Թուրքիա, խաղ է խաղում, որն ի նպաստ իրենց շահերի է:
«Թե այս ամենից հետո Թուրքիան և Հայաստանն ինչ կշահեն՝չգիտենք»,- տեսակետ հայտնեց քաղաքագետը: Սակայն չհերքեց, որ Օլանդը չի կարող շրջանցել Հայոց ցեղասպանության հարցը և այն, որ առջևում Ցեղասպանության 100-ամյա տարելիցն է:
Հիշեցնենք, որ Թուրքիայի ԱԳ նախարար Ահմեդ Դավութօղլուն Փարիզում հանդիպել էր իր ֆրանսիացի ու անգլիացի պաշտոնակիցներին: Հետաքրքրական է, որ կողմերը խոսել են Թուրքիայի ԵՄ անդամակցության շուրջ: Ֆրանսիայի ԱԳ նախարարն ասել է, որ պետք է սկսվեն Թուրքիայի ԵՄ անդամակցության բանակցությունները:
