Նախընտրական գործընթացներն ապացուցեցին, որ քաղաքական դաշտը ծայրահեղ լճացած է, այն թարմացնելու սուր կարիք կա:
Այսօր «Առաջին լրատվական»-ի հետ զրույցում այս մասին ասաց Հայաստանի Հանրային հեռուստաընկերության լրատվական և վերլուծական հաղորդումների տնօրեն Գևորգ Ալթունյանը՝ ամփոփելով նախընտրական քարոզարշավը:
Ըստ քաղաքական մեկնաբանի՝ թե ինչու երկրի քաղաքական կյանքում ծանրակշիռ դերակատարություն ունեցող որոշ ուժեր չմասնակցեցին նախագահական ընտրություններին` իրենց խնդիրն է: Նրա համոզմամբ՝ հանրությունը շատ համահունչ կարձագանքի տեղի ունեցածին, ինչով նախապայման կստեղծվի, որ քաղաքական դաշտում վերադասավորումներ տեղի ունենան:
«Նախընտրական գործընթացներն ապացուցեցին, որ քաղաքական դաշտը ծայրահեղ լճացած է, և այն թարմացնելու սուր կարիք է զգացվում` ինչպես քաղաքական դեմքերի, այնպես էլ ուժերի առումով»,- տեսակետ հայտնեց Գևորգ Ալթունյանը՝ շարունակելով, որ բացարձակ ֆավորիտ նախագահի թեկնածուի գործոնը պայմանավորված է քաղաքական յուրահատուկ իրողություններով: Ըստ նրա՝ եթե ընտրություններից շաբաթներ առաջ քաղաքական ընդդիմությունը միավորող կառույցի ղեկավարը հայտարարում է, թե չի մասնակցելու ընտրություններին, դրանով արդեն իսկ էական սրբագրում է մտցնում քաղաքական դաշտում` կամա թե ակամա ուժեղացնելով իշխանության թեկնածուի դիրքերը: «Երբ նույնկերպ են վարվում ևս մի քանի ուժեր, պատկերն առավել արտահայտիչ է դառնում»,- նկատեց քաղաքական մեկնաբանը:
Անդրադառնալով նախընտրական քարոզարշավի ընթացքում լրատվամիջոցների աշխատանքին՝ նա ասաց, որ լուսաբանումը փայլուն էր, որևէ բանով չէր տարբերվում ֆրանսիական կամ շվեդական լրատվամիջոցների աշխատանքից` ընտրական պրոցեսների ընթացքում:
«Առավել քան համոզված եմ, որ ընտրողները քարոզարշավի լուսաբանման ընթացքում հնարավորություն ստացան իրական կարծիք կազմելու թեկնածուների մասին: Իմ կարծիքով՝ քարոզարշավը որոշ թեկնածուների մասով անակնկալ բացահայտում էր ընտրողների համար: Մի մասի պարագայում էլ քարոզարշավը դիմակը պատռելու գործընթացի վերածվեց՝ դատարկ, գաղափարապես սնանկ լինելու ապացույցի: Իմ խորին համոզմամբ՝ քարոզարշավը ծայառեց իր նպատակին»,- խոսքը եզրափակեց Գևորգ Ալթունյանը:
