Առողջապահության փոխնախարար Վահան Պողոսյանն այսօր առավոտյան այցելել է հացադուլ հայտարարած նախագահի թեկնածու Անդրիաս Ղուկասյանին:
«Առաջին լրատվական»-ի հետ զրույցում Վ. Պողոսյանն ասաց, որ Ա. Ղուկասյանի վիճակը կայուն է, գանգատներ ունի միայն թուլության հետ կապված. «Երբ իրեն շատ մարդ է այցելում, էներգիա է վատնում՝ իրեն թույլ է զգում, միայն դա է իր գանգատը: Մենք իր հետ պայմանավորվել ենք, որ հացադուլից հետո լաբորատոր հետազոտություն,նաև բուժում պետք է անցնի հիվանդանոցում, կսկսի քիչ-քիչ սնվել և կվերականգնի իր առողջությունը»,-ասաց ԱՆ փոխնախարարը:
Մեր այն հարցին, թե հնարավո՞ր է հացադուլի 26-րդ օրը մարդը լինի այնքան առույգ, որպեսզի կարողանա շփվել լրագրողների հետ, հարցազրույցներ տալ, Վ. Պողոսյանն ասաց. «Նման գնահատական տալու համար պետք է լրացուցիչ հետազոտություն անցկացնել, անպատասխանատու հայտարարություններ անելը սխալ է, նրա ճնշումն են պարբերաբար չափում, և մի քանի անալիզ է տվել միայն, իսկ այդտեսականալիզներով հստակ պատկեր չի երևում, լրացուցիչ անալիզներ է հարկավոր հանձնել, որպեսզի որևէ բան կարողանանք ասել»:
Մեզ հետ զրույցում, սակայն, բժիշկ-թերապևտԿառլեն Թովմասյանը կարծիք հայտնեց, որ միայն ջուր խմելով անհնար է 25 օր դիմանալ. «Ընդհանրապես, ասում են՝ մարդը միայն ջուր խմելով կարող է 40 օր ապրել, տեսականորեն, այո՛, կարող է, բայց շատ հազվադեպ:
Որպես բժիշկ կարծում եմ, որ մարդը, ցանկացած իմունիտետ ունենալու դեպքում, միայն ջուր խմելով հացադուլի 25-րդ օրն ի վիճակի չէր լինի խոսել կամ կապակցված միտք արտահայտել, երկու շաբաթից հետո մեծ է նաև կոմայի մեջ ընկնելու հավանականությունը: Մարդուն կարող է պահել միայն ջրի մեջ մեղր խառնելը, միայն այդկերպ կարող ես դիմանալ և ինքնազգացողությունդ կարգավորել»:
