Սիրիայում քաղաքական անցումային գործընթացը պետք է սկսվի առանց երկրի նախագահ Բաշար Ալ-Ասադի մասնակցության: Ինչպես հաղորդում է Rosbalt-ը, այս մասին Պարսից ծովի երկրների անվտանգության հարցերին նվիրված համաժողովում հայտարարել է Ֆրանսիայի պաշտպանության նախարար Ժան-Իվ լե Դրիանը:
«Սիրիայի ժողովուրդն արդեն հսկայական գին է վճարել այս պատերազմի համար: Այժմ ավելի քան երբևէ անհրաժեշտ է գործել, քաղաքական տարաձայնությունները հաղթահարելու և քաղաքական գործընթաց սկսելու համար, որում Ասադին տեղ չի լինի»,- ասել է նախարարը:
Ավելի վաղ ԱՄՆ պետքարտուղար Ջոն Քերին հայտարարել էր, որ Սիրիայում ճգնաժամի վերաբերյալ ցանկացած որոշում պետք է ենթադրի երկրի նախագահի հրաժարական: Նրա խոսքերով` Ալ-Ասադը սխալվել է իր հաշվարկներում. նա մինչև հիմա չի հասկացել, որ իշխանության գլխին գտնվելու իր օրերը հաշված են: Քերիի կարծիքով` ԱՄՆ-ը պետք է Ալ-Ասադին համոզի, որպեսզի նա այլ կերպ գնահատի իրավիճակը:
Հիշեցնենք, որ Սիրիայի նախագահ Բաշար Ալ-Ասադը Հորդանանի մտավորականների պատվիրակության հետ հանդիպման ժամանակ հայտարարել էր, որ սիրիական պետությունը երբեք հետ չի կանգնի իր սկզբունքներից, չնայած դրսից գործադրվող ճնշմանը:
