ՀՀ նախագահի թեկնածու Արման Մելիքյանը նախընտրական քարոզարշավի սկզբում խոստացել էր անցկացնել հետազոտություն, ինչի արդյունքներով կհստակեցվեր, թե իրականում որքան ընտրող կա Հայաստանում: Այսօր լրագրողների հետ հանդիպմանը թեկնածուն ներկայացրեց ուսումնասիրության արդյունքները. «Մենք օգտվել ենք միջազգային տվյալներից և ոստիկանության անձնագրային ու վիզաների բաժնից, կիրառել ենք համեմատական մեթոդաբանություն, և պատկերը բավական հետաքրքիր է»:
Բանախոսը նշեց, որ ինքը ԿԸՀ-ից էր պահանջում նման ուսումնասիրություն կատարել և հրապարակել պաշտոնական տվյալներ՝ ընտրակեղծիքից խուսափելու համար, սակայն դա չարվեց:
Արման Մելիքյանը ներկայացրեց, որ ՀՀ-ում 1մլն 260 հազար ընտրող երկրում չեն, ինչը նշանակում է, որ Հայաստանում 1 մլն 250 հազար ընտրող կա. «Ըստ հետազոտության՝ հավանաբար քվեատուփերին կմոտենա ընտրողների 56 տոկոսը, լավագույն դեպքում՝ 800-850 հազար մարդ»:
Նախագահի թեկնածուն չի հավատում որ ընտրությունները կանցնեն առանց կեղծիքի, իսկ ինքն անձամբ չի մասնակցի ընտրություններին. «Մենք այս ընտրարշավի ընթացքում այդպես էլ չհասանք քաղաքական երկխոսության, որից հետո կդնեինք ընտրական մշակույթի հիմքերը: Անգամ կեղծված ընտրությունների ժամանակ մենք կունենանք իշխանություն, սակայն ես կարող եմ շնորհավորել միայն աթոռը զբաղեցնելու, ոչ թե ընտրվելու համար»:
Լուսանկարը՝ PanARMENIAN Photo-ի