NASA-ի գիտնականների գնահատականներով՝ մթնոլորտ ներթափանցելուց հետո երկնաքարի պայթյունի ուժգնությունը կազմել է 300 կիլոտոննա: Դա 20 անգամ ավելի հզոր է Հիրոսիմայի ռումբի պայթյունից` հաղորդում է NASA-ն:
Տիեզերական գործակալության մասնագետները նաև պարզել են, որ երկնային մարմինը մթնոլորտ է ներթափանցել 18կմ/վ արագությամբ և պայթել է երկրի մակերևույթից 19-24 կմ բարձրության վրա: Օբյեկտի տրամագիծը կազմել է 15մ, իսկ քաշը՝ 7 հազար տոննա:
Դա խոշորագույն երկնաքարն էր 1908թ.-ի Տունգուսյան աղետից հետո:
Հիշեցնենք, որ փետրվարի 15-ին Ուրալի շրջանի բնակիչները բռնկում են տեսել օդում, իսկ հետո լսել պայթյունի ձայն: Չելյաբինսկում և այլ քաղաքներում հարվածային ալիքից կոտրվել են բնակելի տների ու խանութների պատուհանների ապակիները:
Պայթյունի հետևանքով տուժել է 1200 մարդ: Հիմնականում նրանք տուժել են ապակիների կոտրվածքներից:
«Այսօրվա միջադեպից հետո շատերը ուշադրություն կդարձնեն տիեզերքից եկող վտանգների խնդրին: Հավանաբար դա պատճառ կհանդիսանա, որ երկնաքարերն ավելի մանրամասն ուսումնասիրվեն»,- նշել է նախկին տիեզերագնաց Ռաստի Շվեյհարտը:
