Ըստ թուրքական Milliyet թերթի՝ վարչապետ Էրդողանը շոկի մեջ է գցել թուրք ազգայնականներին: Նշվում է, որ Էրդողանի գլխավորած «Արդարություն և զարգացում» կուսակցությունը (ԱԶԿ) իր պատգամավորական թեկնածուների ընտրացուցակում ընդգրկել է նեոֆաշիստական «Գորշ գայլեր» կազմակերպության և «Ազգայնական շարժում» կուսակցության (ԱՇԿ) հիմնադիր, պանթյուրքիստ, Başbuğ («Առաջնորդ») մականվամբ հայտնի Ալփարսլան Թյուրքեշի որդուն:
Խոսքը Ալփարսլան Թյուրքեշի՝ առաջին կնոջից՝ Մուզաֆֆեր Թյուրքեշից, ունեցած որդու՝ Թուղրուլ Թյուրքեշի մասին է: ԱԶԿ-ն վերջինիս թեկնածությունն առաջադրել է Անկարայի 1-ին ընտրատարածքում:
Հիշեցնենք, որ երբ հունվարի սկզբին վարչապետ Էրդողանն այցելեց Կարս և հայ-թուրքական բարեկամությունը խորհրդանշող տեղի հուշարձանն անվանեց «անճոռնի» ու հրահանգեց ապամոնտաժել այն, դա առաջացրեց ԱՇԿ-ի ներկայացուցիչ, Իզմիրից ընտրված կին պատգամավոր Շենոլ Բալի խոր դժգոհությունը:
Վերջինս քաղաքական շոու անվանեց հունիսին կայանալիք խորհրդարանական ընտրություններից առաջ Էրդողանի կողմից հուշարձանի քանդման կոչը` նշելով, որ այդ հուշարձանն արդեն մի քանի տարի է, ինչ կանգնած է Կարսում, մինչդեռ Էրդողանը դրա մասին հիշեց միայն հիմա` ընտրություններից առաջ.
«Կարսի տարածաշրջանում գտնվում են տասնյակ հազարավոր թուրք զինվորների գերեզմաններ: Բնականաբար, նույն վայրում հայ-թուրքական բարեկամությունը խորհրդանշող հուշարձանի առկայությունը հարուցում է տեղի բնակչության դժգոհությունը: Վարչապետը քաջ գիտակցում է այդ հանգամանքը և օգտվում դրանից»:
Ի դեպ, Թուրքիայում անցկացված հարցախույզները վկայում են այն մասին, որ ԱՇԿ-ն խորհրդարանական ընտրությունների ժամանակ թուրքական խորհրդարանում գոյատևման պայքար է մղելու:
