ՀՀ նախագահի թեկնածու Րաֆֆի Հովհաննիսյանը երեկ aravot.am-ի թղթակցին պարզաբանումներ է տվել «Ազատություն» ռադիոկայանի հայտնի բանավեճի վերաբերյալ, որն այդպես էլ չկայացավ Րաֆֆի Հովհաննիսյանի և Սերժ Սարգսյանի` բանավեճին չներկայանալու պատճառով: Րաֆֆի Հովհաննիսյանը, մեղմ ասած, ճիշտ չի ասում:
ՀՀ նախագահի թեկնածու Հրանտ Բագրատյանի նախընտրական շտաբի հանրային կապերի պատասխանատու Կարինե Հարությունյանի փոխանցմամբ` Րաֆֆի Հովհաննիսյանը զանգել է Հրանտ Բագրատյանին և ասել, որ բանավեճի չի կարող գալ, քանի որ քաղաքից դուրս է գտնվում: Հրանտ Բագրատյանն այս լուրը փոխանցել է «Մարիոթ» հյուրանոցում գտնվող Հրայր Թամրազյանին: Վերջինս ասել է Բագրատյանին` ինչ ես ասում, Րաֆֆին քաղաքում է, ես նրա մոտից եմ գալիս: Ինչ վերաբերում է նրան, թե Բագրատյանն ասել էր, որ բանավեճի չի գնա, Հովհաննիսյանը, գիտի, որ դա վերաբերել է տնտեսական ծրագրին, որը մինչ այդ Րաֆֆի Հովհաննիսյանը չի ունեցել:
Բացի այդ «Ազատություն» ռադիոկայանի բանավեճը չի ներկայացվել որպես տնտեսական բանավեճ, իսկ քաղաքական կամ արտաքին քաղաքական հարցերի շուրջ բանավեճի մասին Հրանտ Բագրատյանը երեբևէ առարկություն չի ունեցել:
Օգտվելով առիթից Հրանտ Բագրատյանի շտաբի անունից հայտարարում ենք. նկատի ունենալով, որ Րաֆֆի Հովհաննիսյանը ծավալուն մի փաստաթուղթ է հրապարակել, որը համարում է տնտեսական ծրագիր, Հրանտ Բագրատյանը Րաֆֆի Հավհաննիսյանին բանավեճի է հրավիրում ս.թ. փետրվարի 15-ին, ժամը 16.00-ից մինչև փետրվարի 16-ի 02.00-ը` ցանկացած տեղում, ցանկացած ժամի, Երևան քաղաքում:
Բանավեճի հրավերը վերաբերում է նաև ՀՀ նախագահի թեկնածու Սերժ Սարգսյանին:
