Հռոմի «Ֆյումիչինո» օդանավակայանում Կոտ Դ’Իվուարի բնակիչն ինքնահրկիզման փորձ է կատարել:
Տղամարդը ծանր վիճակում հոսպիտալացվել է: Բժշկական օգնություն է ցուցաբերվել նաև ոստիկանին, ով կրակը մարելիս ձեռքերն այրել է: Այլ տուժածների մասին տեղեկություններ չկան:
Միջադեպը տեղի է ունեցել մաքսատանը: Ոստիկանների խոսքերով՝ տղամարդը ներկայացրել է իր վտարման մասին որոշումը, այնուհետև բենզին է լցրել վրան և այրել: Մաքսատան աշխատակիցներին հաջողվել է կրակը մարել:
Միջադեպն օդանավակայանում ուղևորների շրջանում թեթև խուճապ է առաջացրել: Ամեն դեպքում ուղևորներին այդ հատվածից տարհանել են:
Եվրոպայում սա ներգաղթյալի կողմից ինքնահրկիզման առաջին դեպքը չէ: 2003 թ. Թուրքիայի բնակչուհին Գերմանիայի կառավարության շենքի առաջ փորձել էր իրեն և երկու երեխաներին այրել: 2004 թ. երիտասարդ մի մարդ փորձել էր ինքնահրկիզվել բրիտանական միգրացիոն ծառայության շենքի առաջ: Երկու դեպքերում էլ զոհեր չեն եղել:
