Մոսկվան առաջարկել է ընդլայնել Սիրիայի հարցով «գործողությունների խմբի» ձևաչափը՝ նրանում ներառելով նաև Եգիպտոսին, Աաուդյան Արաբիային և Իրանին: Ինչպես հաղորդում է RIA Novosti-ն, այս մասին հայտարարել է Ռուսաստանի արտգործնախարարի տեղակալ Միխայիլ Բոգդանովը:
«Բնականաբար, մենք շարունակում ենք համարել, որ կարելի է որոշակիորեն ընդլայնել այս ձևաչափը արտաքին այլ ազդեցիկ խաղացողների հաշվին: Այստեղ ես կնշեի Սաուդյան Արաբիային, որոշ հարևան երկրների՝ Լիբանան, Հորդանան, Իրաք, չնայած վերջինս ներկայացված է եղել «գործողությունների խմբում», Եգիպտոսին և Իրանին»,- ասել է Բոգդանովը:
Նա հիշեցրել է, որ առաջին անգամ հրավիրելով «գործողությունների խումբ»՝ Մոսկվան առաջնորդվում էր նրանով, թե՝ «որքան շատ լինեն ազդեցիկ արտաքին ուժեր, այնքան ավելի արդյունավետ կլինեն Սիրիայում արյունահեղ հակամարտությունը դադարեցնելու ջանքերը»:
Բոգդանովը նաև նշել է, որ նախնական փուլում կարևոր էր հասնել միջազգային ճանաչման, որից հետո աշխատանքներում ներգրավել Սիրիայի կառավարության և ընդդիմության ներկայացուցիչներին:
Նա ընդգծել է, որ Մոսկվայում անհրաժեշտ են համարում որքան հնարավոր է շուտ անցկացնել Սիրիայի հարցով «գործողությունների խմբի» հանդիպումը, քանի որ Սիրիայում տիրող ներկայիս իրավիճակը կարող է հասցնել երկրի փլուզման:
Բոգդանովը նշել է, որ հանդիպում կարելի է անցկացնել Աֆղանստանի հարցով ՄԱԿ-ի Անվտանգության խորհրդի նստաշրջանի հետ միաժամանակ, որը նախատեսված է մարտի կեսին կամ ապրիլին Լոնդոնում՝ «Մեծ ութնյակի» արտգործնախարարների հանդիպման ժամանակ:
