Հայաստանի գլխավոր դատախազ Գևորգ Կոստանյանը օրեր առաջ Ազգային ժողովին է ներկայացրել իր ղեկավարած կառույցի գործունեության մասին 2014 թվականի տարեկան զեկույցը:
Ուշագրավ է, որ չնայած 2008 թվականի մարտիմեկյան ոճրագործությունների զոհերի հարազատներին տված «տղամարդավարի» խոստումներին՝ Գևորգ Կոստանյանը գեթ մեկ հիշատակում չի արել Մարտի մեկի վերաբերյալ:
Այս հանգամանքն արդարացիորեն հարուցել է Մարտի մեկի զոհերի հարազատների դժգոհությունը, ու պետական համակարգի կողմից այս գործը փակելու և ոչ մի դեպքում բացահայտման ուղղությամբ քայլ չանելու հերթական ապացույցն է:
Մարտի մեկի զոհերից Դավիթ Պետրոսյանի մայրը՝ տիկին Ջեմմա Վարդանյանը, «Առաջին լրատվական»-ի հետ զրույցում ասաց, որ ներկա է եղել Գևորգ Կոստանյանի հետ հանդիպմանը, բայց խիստ դժգոհություն ունի, որ տված խոստումներից հետո դատախազության տարեկան զեկույցում ոչ մի հիշատակում չկա գործի վերաբերյալ:
«Նշանակում է ոչ մի բան էլ չեն անում, ուրիշ ոչ մի բան ասել չեմ կարող: Ոչ մի լավ բան էլ չեմ սպասում»,- ընդգծեց Ջեմմա Վարդանյանը՝ հավելելով, որ դատախազի հետ հանդիպման այլ հրավերներ էլ կան, բայց չգիտի, թե երբ և արդյո՞ք իմաստ ունի նորից գնալ ու հանդիպել, խոստումներ լսել ու որևէ առաջընթաց գործում չարձանագրել:
Կոստանյանը ոճրագործության զոհերի հարազատներին ասել էր, թե երկու ամսվա ընթացքում նրանք կզգան գործի մեջ էական տեղաշարժ, կտեսնեն, որ սայլը տեղից շարժվել է, մինչդեռ ինչպես հետագա զարգացումները ցույց տվեցին՝ այս գործը Կոստանյանը ևս կոծկելու միտում ունի կամ էլ վերադասներից որևէ քայլ չանելու խիստ հրահանգ է ստացել:
Մարտի մեկի զոհերից Գոռ Քլոյանի հոր՝ Սարգիս Քլոյանի խոսքերով՝ այս ընթացքում գործի հետ կապված միակ փոփոխությունը եղել է Մարտի մեկի գործը հետաքննող քննիչի փոփոխությունը: Վերջինիս այս ընթացքում միայն հրավիրել են Հատուկ քննչական ծառայություն, հարցեր ուղղել, որի ժամանակ էլ Քլոյանը պարզել է, որ գործը հետաքննում է բոլորովին նոր քննիչ:
Զոհերի հարազատները միաբերան կրկնում են՝ այս իշխանությունների օրոք, չնայած տարատեսակ խոստումներին, Մարտի մեկի ոճրագործությունը չի բացահայտվելու:
