Փետրվարի 14-ին Բահրեյնը հեղափոխության երկրորդ տարելիցը նշել է նոր անկարգություններով: Երկրի մայրաքաղաք Մանամայում բնակիչները դուրս են եկել փողոցներ՝ պահանջելով քաղաքական բարեփոխումներ, մասնավորապես՝ խորհրդարանի իրավունքների ընդլայնում,- հաղորդում է Associated Press-ը:
Մայրաքաղաքի որոշ շրջաններում բախումներ են տեղի ունեցել ոստիկանների և ցուցարարների միջև: Վերջիններս քարեր և դյուրավառ հեղուկով շշեր են նետել ոստիկանների ուղղությամբ, որոնք, ի պատասխան, կիրառել են արցունքաբեր գազ: Բախումների հետևանքով մահացել է մի դեռահաս. ենթադրվում է՝ նրա վրա կրակել են ոստիկանները:
Ցույցի մասնակիցների մեծ մասը երկրի շիա համայնքի ներկայացուցիչներն են: Շիաները կազմում են Բահրեյնի բնակչության 70%-ը, սակայն փաստացիորեն նրանք հեռացված են պետության կառավարումից: Բացի այդ, նրանք մշտապես ենթարկվում են կրոնական բնույթի խտրականության:
Բահրեյնում փաստացի իշխանությունը գտնվում է սուննի փոքրամասնության ձեռքում՝ Ալ-Խալիֆ թագավորական ընտանիքի գլխավորությամբ: Համադ թագավորը կառավարության անդամներ է նշանակում է իր հարազատներին, որոնք պատասխանատու են միայն նրա առջև: Բահրեյնի խորհրդարանը կրում է հիմնականում խորհրդատվական բնույթ:
Նախկինում իշխող ընտանիքը մի քանի անգամ հայտարարել է ընդդիմության հետ բանակցելու պատրաստակամության մասին, սակայն դրա հետ մեկտեղ առաջ է քաշել ծանր նախապայման. ցանկացած դեպքում կառավարությունը հաշվետու է միայն թագավորին: Ընդդիմությունը կարծում է, որ այս դեպքում բանակցություններն իմաստ չունեն, այդ պատճառով մարդիկ շարունակում են փողոց դուրս գալ:
