«Առաջին լրատվական»-ի զրուցակիցն է ՀՀԿ խմբակցության անդամ Սուքիաս Ավետիսյանը:
– Պարոն Ավետիսյան, Դուք ներկա եք եղել Գյումրիում Սերժ Սարգսյանի նախընտրական այցելությանը: Հանդիպումներից հետո ռեստորանում ճաշկերույթի ժամանակ Գյումրիի քաղաքապետ Սամվել Բալասանյանին թույլ չեն տվել, որ նա Ս. Սարգսյանի հետ նույն սեղանի շուրջ նստի: Ս. Բալասանյանն էլ վիրավորված լքել է ճաշկերույթը: Ի՞նչն է եղել նրա նկատմամբ այդ վերաբերմունքի պատճառը:
– Նման բան չի եղել, որ թույլ չեն տվել: Ինչպես միշտ, ցանկացած պաշտոնական ճաշկերույթների ժամանակ նախագահի արարողակարգային բաժինն է որոշում, թե ով որտեղ նստի: Եվ նախօրոք բոլորին զգուշացնում են: Այնպես չէ, որ նա ուզեցել է ինչ-որ տեղ նստել, թույլ չեն տվել:
– Այդ դեպքում նա ինչո՞ւ է լքել խնջույքը:
– Դա իրենից հարցրեք, թե ինչու է թողել-գնացել: Նա նախագահին ուղեկցել է մինչև այնտեղ, բոլորը նստել են, ինքը գնացել է:
– Ասում են, որ Ս. Բալասանյանը վիրավորվել է այդ վերաբերմունքից:
– Ո՜չ, այդպես չի եղել: Նախագահի արարողակարգից մեզ բոլորիս նախօրոք զգուշացրել են, թե ով որ սեղանին է նստելու:
– Այո, և այնպես են դասավորել, որ Գյումրիի քաղաքապետին իրենից պաշտոնով շատ ավելի ցածր մարդկանց հետ են տեղ հատկացրել, ինչը նման դեպքում ընդունված չէ և վիրավորական է համարվում:
– Ճիշտն ասած, չեմ կարծում, որ սեղանակիցներին կարելի է պաշտոնով ցածրի ու բարձրի բաժանել: Սեղանակիցը սեղանակից է: Պատգամավորների մի մասը նախագահի սեղանին են նստել, մի մասն էլ կողքի սեղանին: Հիմա կարելի՞ է ասել, որ այդ պատգամավորները բարձր ու ցածր են:
– Քանի որ ԲՀԿ–ն որևէ թեկնածուի չի պաշտպանում, իսկ Ս. Բալասանյանը հայտարարել է, որ Ս.Սարգսյանին է պաշտպանում, ասում են, որ այս առումով նրա հարաբերությունները նախ վատացել են Գագիկ Ծառուկյանի հետ, հիմա էլ ասում են, թե Ս. Սարգսյանը նրան նախկինի նման չի ընդունում:
– Այդ մասին չգիտեմ: Համենայնդեպս, ինձ հետ նույն սեղանին նստած են եղել նաև Շիրակի մարզի ԲՀԿ պատգամավորները՝ Մարտուն Գրիգորյանը, Մուշեղ Պետոյանը:
– Այս երկու պատգամավորները նույնպե՞ս սատարելու են Ս. Սարգսյանին:
– Այո՜:
– Պարզապես ընտրելո՞ւ են, թե՞ սատարելու են:
– Ասում եմ, որ սատարելու են և սատարում են: Նրանցից ամեն մեկն էլ փորձում է իր լուման ունենալ: Ի՞նչ վատ է, ինչո՞ւ եք դուք վատ զգում:
– Ս. Սարգսյանին սատարելը կոնկրետ աշխատանքո՞վ են անում:
– Այո՜, մարդիկ աշխատում են, մեզ հետ հանդիպում են, հարցեր են քննարկում: Մենք նրանց ակտիվների հետ ենք շփվում և համագործակցում: Դա սատարել չէ՞:
– Այսինքն` ԲՀԿ–ում թեկուզև առանձին–առանձին, բայց սատարում են Ս. Սարգսյանին:
– Չէի ասի, թե ԲՀԿ-ն, համենայնդեպս այն, ինչ մեր մարզում կա, ասում եմ: Այո՜, մեր մարզի ԲՀԿ-ական պատգամավորները մեզ այդ հարցում օգնում են:
– Բայց կոնկրետ Մարտուն Գրիգորյանը հայտարարել էր, թե ինքը պարզապես ընտրելու է Ս. Սարգսյանին և ոչ թե սատարելու է նրան:
– Ես հիմա Ձեզ ասում եմ, որ մենք նրանց հետ համագործակցում ենք: Հիմա դուք կգրեք, թե սատարում են, համագործակցում են, դա ձեր գործն է: Ես ասացի այն, ինչ որ կա:
– Իսկ հավանական համարո՞ւմ եք կամ նրանց կողմից ցանկություն նկատե՞լ եք, որ նախագահական ընտրություններից հետո ԲՀԿ–ն ՀՀԿ–ի հետ կոալիցիա կազմի:
– Չեմ կարող ասել, թե ընտրություններից հետո ինչ կլինի: Այդ թեման մենք չենք քննարկել: Մենք հիմա քննարկում ենք միայն նախագահական ընտրությունների հետ կապված ցանկացած թեմա:
– «Ժառանգություն» կուսակցության նախագահ Րաֆֆի Հովհաննիսյանի Գյումրի կատարած այցի ժամանակ էլ բավականին շատ մարդ էր հավաքվել: Փաստորեն, Գյումրիում շարունակում են գերակշռել ընդդիմադիր հայացքները:
– Եթե թատրոնի դահլիճը լցվում է, դա շա՞տ է: Այս ընթացքում մեր կողմնակիցներն այդ դահլիճը մի քանի անգամ են լցրել: Մարդիկ գնացել են Րաֆֆիին լսելու, ի՞նչ է եղել:
– ԲՀԿ–ն անցած տարվա խորհրդարանական ընտրություններին Գյումրիում հաղթեց ՀՀԿ–ին: Ձեր կարծիքով` այդ կուսակցության ընտրողներն այս անգամ ո՞ւմ են ընտրելու: Չէ՞ որ իրենք թեկնածու չունեն:
– Չեմ կարող ասել: Մի մասը հավանաբար մեր թեկնածուին են ընտրելու: Ի վերջո, այնտեղ վերջին տարիներին հսկայածավալ աշխատանք ենք արել:
– Այդ դեպքում ինչո՞ւ խորհրդարանական ընտրություններին չկարողացաք հաղթել:
– Ոչինչ, խորհրդարանական ընտրությունների ժամանակ մրցակցություն կար, կար թեկնածուի գիտենալ-չգիտենալու խնդիր: Պետք չէ նույնացնել:
– Ս. Սարգսյանը Գյումրի կատարած այցի ժամանակ ասել էր, թե ինքը «տոկոսներ է խփելու»: Ինչպե՞ս եք պատրաստվում այդ տոկոսները «խփել»:
– Մենք չենք պատրաստվում խփել, մենք պատրաստվում ենք մեր աշխատանքով անել այն, ինչ որ պետք է:
– Այդ դեպքում նախագահն ինչո՞ւ է այդպես ասել:
– Նախագահն ասել է՝ հաշվի առնելով իր թիմի աշխատանքը:
– Այսինքն` նախագահի թի՞մն է «խփելով» հավաքում այդ տոկոսները:
– Խփելով չի հավաքելու, աշխատելով է հավաքելու:
