Թուրքական հեղինակավոր պարբերականներից «Վաթանն» ապրիլի 10-ի համարի շապիկը հատկացրել է Քիմ Քարդաշյանի այցին և դրա հետ կապված Հայոց ցեղասպանության ճանաչման քայլերին:
«Պատմությունը Քիմին է մնացել». նման վերտառությամբ էլ Քարդաշյանի հայաստանյան այցելությանը նվիրված հոդվածը տեղ է գտել թուրքական թերթում: Շապիկին պատկերված են Քիմ և Քլոե Քարդաշյանները Երևանում զբոսնելիս:
«Երկու երկրների արխիվները բացեք», «պատմաբանները թող ուսումնասիրեն» ասելիս Հայաստանը 1915-ի դեպքերի (Հայոց ցեղասպանության-խմբ.) 100-ամյակին հույսը դրել է «բարեմասնություններով հայտնի» ամերիկահայ հեռուստաաստղ Քիմ Քարդաշյանի վրա»,-գրված է «Վաթանի» հոդվածում:
Այնուհետև, թուրքական աղբյուրը մանրամասնում է հայտնի ռեփեր Քանյե Ուեսթի և Քարդաշյան քույրերի հայաստանյան այցը, նշում է, որ նրանք Ցեղասպանության վերաբերյալ ֆիլմ են նկարահանելու: Ապա նաև խոսվում է Քիմի արմատների մասին՝ նշելով, թե «նրա պապն էրզրումցի է»:
Նշենք, որ թուրքական ամենատարբեր լրատվամիջոցներ մշտապես ուշադրության կենտրոնում են պահում Քիմ Քարդաշյանին, ով, կարելի է ասել, թուրքական մեդիայում ամենահայտնի աստղերից է:
Քարդաշյանի հայաստանյան այցն արդեն լուսաբանում են մի շարք հեղինակավոր թուրքական թերթեր, հեռուստաընկերություններ, լրատվակայքեր:
