Վրաստանի վարչապետ Բիձինա Իվանիշվիլին ընդունել է «Արևելյան գործընկերության» ոչ պաշտոնական հանդիպման մասնակիցներին:
Վարչապետի մամլո գրասենյակից հայտնել են, որ հանդիպմանը մասնակցել են ԵՄ ընդլայնման և հարևանության քաղաքականության հարցերով եվրահանձնակատար Շտեֆան Ֆյուլեն, Եվրահանձնաժողովի փոխնախագահ, տրանսպորտի հարցերով եվրահանձնակատար Սիիմ Կալասը և «Արևելյան գործընկերության» երկրների պատվիրակությունների ղեկավարները:
Հանդիպման մասնակիցներն ամփոփել են Թբիլիսիում կայացած ոչ պաշտոնական նախարարական խորհրդի նիստը, քննարկել են «Արևելյան գործընկերության» շրջանակներում տարբեր ոլորտներում համագործակցության հարցեր, Վրաստանի և ԵՄ-ի միջև առաջընթացի և «Արևելյան գործընկերության» վիլնյուսյան գագաթաժողովի նախապատրաստական հարցերը:
Վրաստանի վարչապետն ընդգծել է «Արևելյան գործընկերության» անդամ երկրների հարաբերությունների խորացումը ԵՄ-ի հետ և նրանց հետ եվրոպական ժողովրդավարական արժեքների նկատմամբ նույն մոտեցումներ ունենալը: «Ներկա գտնվող երկրները լավ հասկանում են, թե որտեղ են իրական արժեքները: Բոլոր երկրների բնակիչններն էլ ձգտում են լավագույնին: Շնորհակալություն Եվրոպային, որ մեզ ցույց է տվել լավագույն ուղին, որով մենք հաճույքով գնում ենք»,- ասել է Իվանիշվիլին:
Վարչապետը շնորհակալություն է հայտնել նիստի մասնակիցներին Վրաստան այցի համար:
